Arysta kúnine 1,5 myń áskerı qyzmetshi áli de jarylys saldaryn joıýmen aınalysady

NUR-SULTAN. QazAqparat – Arysta kún saıyn myń jarym áskerı qyzmetshi oq-dárilerdiń bólikterin izdeý, zalalsyzdandyrý, tasymaldaý, joıý jumystaryn júrgizip jatyr. Bul týraly QR QK Tyl jáne qarý-jaraq basqarmasynyń bastyǵy Asylbek Satybaldınov málim etti, dep habarlaıdy QazAqparat tilshisi.

«Jarylys qaýpi bar fragmentterdi joıý jumystarynyń basym bóligi Arys qalasynan 50 shaqyrym jerdegi - Bastarma polıgonynda atqarylýda. Azamattyq ortaǵa oq-dárilerdiń urlyǵy arqyly enip ketýin, túrli-tústi metall synyǵynyń satylýyn aldyn alý maqsatynda profılaktıkalyq reıdter turaqty túrde uıymdastyrylady. Ýtılızatsııa ornynda jınaqtalǵan oq-dáriler táýlik boıy kúzetiledi», - deıdi Asylbek Satybaldınov OKQ-da ótken baspasóz máslıhatynda.

Onyń aıtýynsha azamattyq tulǵalardyń jınaqtalǵan oq-dáriler ornyna kirip ketý jaǵdaıy da tirkelgen.

«Tártipti qadaǵalaý úshin ishki ister organdarymen birge táýlik boıy kóshelerde patrýl júrgiziledi. Sonymen birge áskerı qyzmetshiler qurylys pen qalpyna keltirý jumysyna belsene atsalysyp, koronavırýs ınfektsııasyna qarsy dezınfektsııa jumystaryn atqardy. Mobıldi dalalyq emhananyń dárigerleri myńǵa tarta azamatqa ártúrli medıtsınalyq kómek kórsetti. Áskerı veterınarlar Aýyl sharýashylyǵy mınıstrliginiń mamandarymen birge 508 bas úı janýaryn dalaǵa kómdi. 9 myń sharshy metr aýmaqtaǵy ólgen maldyń oryndary dezınfektsııalandy. Kún saıyn myń jarym áskerı qyzmetshi oq-dárilerdiń bólikterin izdeý, zalalsyzdandyrý, tasymaldaý, joıý jumystaryn júrgizýde», - dedi ol.

Eske sala ketsek buǵan deıin Asylbek Satybaldınov óńirden jarylý qaýpi bar 330 myń oq-dári áketilgenin málim etken edi.