Arysta qaza tapqan áskerı qyzmetshiniń denesi búgin SQO-ǵa jetkiziledi

PETROPAVL. QazAqparat – Soltústik Qazaqstan oblysynyń Mamlıýt aýdanynda Arys qalasynda qaza tapqan áskerı bólimniń qyzmetkeri Amanjol Aqyshevti aqtyq saparǵa shyǵaryp salýǵa ázirlenip jatyr, dep habarlaıdy QazAqparat tilshisi.

Keshe, 11 qazan kúni Arys qalasynan 60 shaqyrym qashyqtyqta ornalasqan arnaıy jabdyqtalǵan polıgonda oq-dári qaldyqtaryn joıý kezinde áskerı bólimniń ınjenerlik qyzmetiniń bastyǵy, maıor Amanjol Aqyshev qaza tapqan edi.

Amanjol Sabyruly Aqyshev 1986 jyly SQO Mamlıýt aýdany Afonkıno eldi mekeninde týǵan. Ata-anasy osy aýylda turady. Artynda áıeli men eki balasy qaldy.

SQO-nyń Qorǵanys isteri jónindegi departamentinen málim etkendeı, osy oqıǵaǵa baılanysty óńirge QR Qorǵanys mınıstriniń orynbasary Tımýr Dándibaev bastaǵan top jáne Amanjol Aqyshevpen birge qyzmettes bolǵan áriptesteri kele jatyr. QR Qarýly Kúshteri Bas shtaby bastyǵynyń orynbasary Muhamedjan Talasov óńirge jetti. Jerleý rásimimen baılanysty barlyq shyǵyndy mınıstrlik óz moınyna aldy. Sondaı-aq vedomstvo marqumnyń otbasyna materıaldyq-áleýmettik kómek beretini málim boldy.

Áskerı qyzmetshiniń denesi búgin Túrkistan oblysynan SQO-ǵa jetkiziledi. Jer qoınyna tapsyrý rásimi erteń ótedi.

Aıta keteıik, Arys qalasynan 60 shaqyrym jerde ornalasqan polıgon aýmaǵynda oq-dárilerdiń qaldyqtary buǵan deıin de jarylǵan bolatyn. 21 qyrkúıek kúni jarylys saldarynan 10 saper jaraqat aldy.

Atalmysh polıgonǵa Arys qalasynyń terrıtorııasynan jınalǵan oq-dári fragmentteri jetkizilip, joıylyp otyrǵan.

Eske salsaq, Arystaǵy áskerı bólimniń qoımasynda jarylys bıylǵy 24 maýsym kúni boldy. Saldarynan úsh adam qaza tapty - Arys turǵyny men eki áskerı qyzmetshi. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi. Tuńǵysh Prezıdenttiń tóraǵalyǵymen Qaýipsizdik keńesiniń otyrysy ótip, onda Arys qalasyndaǵy ahýal talqylandy.

Evakýatsııalaý kezinde myńnan astam ata-ana balarynan kóz jazyp qaldy. Sábılerdiń barlyǵy týys-týǵandaryna din-aman tapsyryldy.

Fakti boıynsha qylmystyq is qozǵady.

Búginde Arys qalasy 13 sektorǵa bólinip, onda el óńirleriniń qolǵabys etýimen qalpyna keltirý jumystary júrgizilýde.