Arysta qala kúni toılandy

ARYS. QazAqparat – Túrkistan oblysy Arys qalasynda merekelik is-shara ótti. Qala kúnine oraı uıymdastyrylǵan saltanatty sharaǵa jergilikti bılik ókilderi men turǵyndar, sondaı-aq arnaıy kelgen qonaqtar qatysty, dep habarlaıdy QazAqparat tilshisi.

Arystyń ortalyq ál-Farabı alańynda ótken qala kúni merekesinde shahar basshysy Murat Qadyrbek quttyqtaý sóz sóılep, atqarylǵan aýqymdy isterdi baıandap shyqty. Merekege oraı turǵyndarǵa izgi tilegin bildirip, Elbasy jáne Prezıdent tapsyrmalary men memlekettik baǵdarlamalardyń iske asyrylyp jatqanyn atap ótti.

Jarylystan keıin qalanyń jańaryp, gúldenýine, áleýmettik-ekonomıkalyq damýyna erekshe úles qosqan azamattarǵa, eren eńbektiń úlgisin kórsetken dala eńbekkerlerine «Eńbek dańqy» tósbelgisin tabystady. «Alǵys hat» pen «Qurmet gramotasymen» marapattap, baǵaly syılyqtar tabys etti.

Arys aspanyn ánge bólegen mereke odan ári kontserttik baǵdarlamaǵa ulasyp, qala ánshileri alańǵa jınalǵan qaýymǵa óz ónerin pash etti. Án-bıden shashý shashty.

Aıta keteıik, Arys qalasy – Orta Azııanyń qaqpasy, batys pen shyǵys mádenıetiniń toǵysy, qazaq temirjolshylarynyń qutty qonysy sanalady. Toǵyz joldy toǵystyratyn qala ejelden-aq batyrlardyń, jyraýlar men aqyndardyń, ánshilerdiń – óner ıeleriniń qasıetti qonysy, qara shańyraǵy ekeni jurtshylyqqa málim. Munda oryn alǵan jarylystan keıin qala qaıta qalpyna keltirilip, turǵyn úıler men birqatar nysandar jańadan salynǵany belgili.