Arysta dúken men úıdi tonaǵandar ustaldy

NUR-SULTAN. QazAqparat - Arys qalasyndaǵy tótenshe jaǵdaıdy paıdalanyp, bir úı men dúkendi tonaǵan úsh adam ustaldy, dep habarlaıdy QazAqparat tilshisi.

«Oqıǵa ornynda oblystyq jedel shtab quryldy. Jedel jeli iske qosylyp, oǵan osy ýaqytqa deıin 11 myńǵa jýyq qońyraý kelip tústi. Qazirgi ýaqytta urlyq-qarlyqtyń aldyn alý úshin polıtsııanyń 75 narıady oqıǵa ornynda jumys júrgizýde. Sonymen qatar, eki qylmysty jasaǵan úsh adam ustaldy. Atap aıtqanda, bir dúken men bir úı tonalǵan», - dedi Іshki ister mınıstri Erlan Turǵymbaev Úkimet otyrysynda.

Mınıstrdiń aıtýyna qaraǵanda, Arys qalasyna kirgen jáne shyqqan kólikterdiń barlyǵy tekserilip jatyr.

«Tótenshe jaǵdaıdyń saldarynan eki adam kóz jumdy. Biri Arys qalasynyń áskerı bóliminiń áskerı qyzmetshisi, ekinshisi Arys qalasynyń turǵyny. Eki adam jansaqtaý bóliminde jatyr. 34 adam aýrýhanaǵa jatqyzyldy. Jeńil jaraqat alǵan 12 adamǵa medıtsınalyq kómek kórsetildi», - dedi ol.

Eske sala ketsek, Arys qalasyndaǵy áskerı bólimniń qoımasynda keshe tańerteń jarylys bolǵandyǵy týraly habarlaǵan bolatynbyz. Apat saldarynan eki adam mert boldy.

Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi.