Arysta bos qalǵan úıler kúzetiledi, tonaýshylyq bolmaıdy - Ermekbaev
Eń aldymen mınıstr jarylystan qaza tapqan turǵynnyń jaqyndaryna kóńil aıtty.
«Qaza tapqan kisiniń jaqyn týystaryna jáne jaraqat alǵandarǵa kóńil aıtamyz. Búgin Arys qalasynda áskerı oq-dáriler arsenaly qoımalarynyń birinde órt shyǵyp, jarylys boldy. Jarylys basqa qoımalarǵa jalǵasty, sondyqtan birneshe qoıma jarylyp ketti. Óńir ákimdigi pen TJ komıtetiniń is-áreketiniń arqasynda eldi mekenderden barlyq turǵyndar shyǵaryldy», - dedi mınıstr Arys qalasynda tikeleı efırde ótken brıfıngte.
Sonymen birge, N. Ermekbaev arsenalda qaýipti oq-dárilerdiń saqtalmaǵanyn jetkizdi.
«Bul arsenalda qaýipti oq-dáriler men bombalardyń saqtalmaǵanyn resmı málimdeımin. Barlyq oq-dáriler saqtyq úshin dalaǵa qaraı baǵyttalyp qoıylǵan jáne negizgi soqqy tolqyny dalaǵa qaraı júrdi. Tolqynnyń bir bóligi eldi mekenge áser etip, birneshe baspananyń shatyry men terezesine zaqym keldi. Qaýipsizdik úshin Arys turǵyndaryna jaqyn arada jedel shtabtyń ruqsatynsyz úılerine kelmeýdi suraımyz. Sebebi Arystyń kóshelerinde jarylmaı qalǵan oq-dáriler bolýy múmkin. Qazir bir top saper tazalaý jumystaryn júrgizip jatyr. Bul jumystar aıaqtalǵan soń, turǵyndar óz úılerine orala alady. Qazir barlyq úıler men kvartaldar polıtsııa men qarýly kúshterdiń jiti baqylaýynda. Sondyqtan múliktiń saqtalýy jóninde turǵyndar ýaqymdamaǵany jón. Eshqandaı tonaýshylyq pen urlyq-qarlyq bolmaıdy», - dedi Qorǵanys mınıstri.