Arysta balalardy sýıtsıdke ıtermeleýmen aınalysqan adam ustaldy

NUR-SULTAN. QazAqparat - Semınarlar barysynda ata-ana, muǵalimderdiń tsıfrlyq tehnologııa turǵysynan qaraǵanda saýatsyz ekeni anyqtaldy. Bul týraly Ortalyq kommýnıkatsııalar ortalyǵynda «Ózińdi jáne jaqyndaryńyzdy býllıng jáne kıberbýllıngten qalaı qorǵaýǵa bolady» taqyrybynda ótken brıfıngte aıtyldy, dep habarlaıdy QazAqparat tilshisi.

«Men uzaq jyldar boıy mektepte jumys istedim. Oqýshylar arasynda kelispeýshilik bolatynyn, synyp jetekshisi osy máseleni sheshýge tyrysyp júretinin bilemiz, biraq sońǵy ýaqytta býllıng taqyryby órship ketti. Tipti birneshe jyl buryn ǵana kıberbýllıng degen sózdiń ne ekenin bilmeıtinbiz. Áleýmettik jelige basqanyń sýreti, basqanyń aty-jónimen tirkelip, ul-qyzdardyń senimine kirip alatyndar shyqty. Memleket basshysy osy taqyrypqa nazar aýdarǵany qýantady», - deıdi «Ehro&Women» halyqaralyq uıymnyń basqarma tóraǵasy Lıazıat Asqarova.

Ol bıyl osy taqyrypta semınarlar ótkizgenin aıtty.

«Semınarlar barysynda ata-ana, muǵalimderdiń tsıfrlyq tehnologııa turǵysynan qaraǵanda saýatsyz ekeni anyqtaldy. Balalarymyz bul jaǵynan áldeqaıda ozyp ketken. Onlaın semınarlarǵa 200-ge jýyq adam qatysty», - deıdi ol.

Lıazıat Asqarova býlıng qazaqy ortada da bar ekenin aıtty.

«Mysaly, kishkentaı ǵana Arys qalasynda Telegram kanaly arqyly balalardy sýıtsıdke ıtermeleýmen aınalysqan adam ustaldy. Tipti qazaq tilinde «Jumaqqa jetýge elý qadam» dep atalatyn oıyn paıda boldy. Biz mundaı jaǵdaıǵa daıyn bolmaǵanymyz anyq», - deıdi ol.

«Osyǵan qatysty zańdy qatańdatý kerek. Eń úlken qundylyq - adam qundylyǵy ekenin umytpaýymyz kerek. Býllıng otbasynan bastalady. Bala úıde zorlyq-zombylyq, agressııa kórip júrse, ol ony mektep jáne basqa da ortaǵa aparyp, ishindegisin solaı shyǵarýǵa tyrysady», - deıdi «Ehro&Women» halyqaralyq uıymnyń basqarma tóraǵasy.