Arysta aýyl sharýashylyǵy men týrızmdi qatar damytatyn erekshe joba qolǵa alyndy

ARYS. QazAqparat - Qojatoǵaı aýyldyq okrýginde iske qosylǵan «Mýbarak Agro» sharýa qojalyǵynda aýyl sharýashylyǵy men týrızm qatar damytylady, dep habarlaıdy QazAqparat tilshisi.

Bıyl ǵana jumysyn bastaǵan seriktestik búgingi tańda 400 bas qısary asyl tuqymdy qoı ósirip otyr. Odan bólek, 30 bas jylqy bar.

Atakásipti qaıta jandandyrýdy myqtap qolǵa alǵan seriktestikke qazirdiń ózinde 200 mln teńge ınvestıtsııa tartylǵan.

Sharýa qojalyǵynyń tóraǵasy A.Shúkirbekov aldaǵy ýaqytta 500 basqa arnalǵan mal bordaqylaý alańyn ashýdy josparlap otyr.

Sonymen qatar qojalyq ıesi bul jerdi demalys ornyna aınaldyrý úshin qus jáne balyq sharýashylyǵyn damytýdy kózdeýde.

Osy maqsatta ol qojalyq aýmaǵynan taýyq, qyrǵaýyl, taýys (pavlın), úırek, qaz syndy 9 túrli qus túrin ósirip, sondaı-aq balyq sharýashylyǵyn damytýdy qolǵa almaq.

Kásipker demalys aýmaǵynda 3 úı, kelýshilerge arnalǵan kıiz úı, zamanaýı úlgidegi monsha, basseın, fýtbol jáne balalar oıyn alańshalaryn salýdy kózdep otyr.

Demalys aýmaǵyn abattandyrý maqsatynda bıyl atalǵan qojalyq ıesi 8 gektar aýmaqqa baý-baqsha ósirmekshi.

Atap aıtqanda, 4000 túp (jıde, terek, tut, qaraǵash) tal egilse, keler jyly kóktemde 10 000 túp (alma, júzim, órik, almurt, jańǵaq) egý josparda bar.

Seriktestiktiń ashylý saltanatynda sóz sóılegen shahar basshysy G.Qurmanbekova óńirdiń aýyl sharýashylyq salasynyń áleýeti zor ekenin aıta kele sharýalarǵa memleket tarapynan jan-jaqty kómek toqtamaıtynyn aıtty.

Aıta keteıik, quny 1 mıllıardtan astam teńgeni quraıtyn seriktestiktiń jalpy jer kólemi — 12 gektar.

Joba aıasynda 50-ge jýyq azamat turaqty jumyspen qamtylady.