Arysta 80 jastaǵy keıýana bir jarym táýlikti tótenshe aýmaqta ótkizgen
«25 maýsym kúni saǵat 15.30 kezinde Arys eldimekeninde qoǵamdyq tártipti qadaǵalaǵan Ulttyq ulannyń áskerı qyzmetshileri - patrýlde júrgen qatardaǵy jaýyngerler D.Aýdanbaev pen J.Tóleýbaı Áıteke bı kóshesimen kele jatyp, aýlalardyń birinen egde adamnyń daýysyn estip qalady. Aýlaǵa kirgennen keıin olar 80 jastaǵy áje - Kravchenko Tomıs Fedorovnanyń júrgenin kórgen. Egde adam qorǵansyz qalyp, jan-jaǵynan kómek surap júr eken. Onyń densaýlyǵynyń jaǵdaıy men mán-jaıdy anyqtaǵansha, onyń kúıi kúrt aýyrlaı túsken», - dep habarlady QR Ulttyq ulan baspasóz qyzmetinen.
Ulttyq ulandyqtar birden jedel járdem kóligin shaqyrǵan. Arystaǵy bólimsheniń feldsheri Týǵanbaeva bastaǵan medıtsına qyzmetkerleriniń toby oqıǵa ornyna 15 mınýtta jetip, 80 jastaǵy áıel aýrýhana dárigerlerine tapsyryldy.
«Áskerı narıadtyń ýaqtyly ári jyldam áreketiniń arqasynda adam qutqaryldy», - delingen habarlamada.
Eske sala ketsek, Arys qalasyndaǵy áskerı bólimniń qoımasynda 24 maýsym kúni tańerteń jarylys boldy. Apat saldarynan úsh adam mert boldy. 170-ke jýyq adam zardap shekti. 20-ǵa jýyq úı, 9 qora-qopsy janyp, dalaly aýmaqta 14 oshaq tutandy. Úı-jaılar men ǵımarattardyń 80-90 paıyzyna ártúrli deńgeıde zaqym keldi. Birqatar óńirde shuǵyl jeliler quryldy.
Túrkistan oblysyna arnaıy barǵan Qazaqstan Prezıdenti Qasym-Jomart Toqaev Arystaǵy áskerı bólimshedegi oq-dári qoımasyndaǵy jarylystan zardap shekken qala turǵyndarymen kezdesip, qalanyń qalpyna keltiriletinine ýáde berdi. Sondaı-aq Elbasy Nursultan Nazarbaev Arystaǵy jaǵdaıǵa alańdaýshylyq bildirdi.
Búgingi Úkimet otyrysynda Premer-Mınıstr Asqar Mamın jarylys saldarynan kóz jumǵandardyń týǵan-týystaryna kóńil aıtyp, turǵyndarǵa barlyq kómek kórsetiletinin aıtty.
Evakýatsııalaý kezinde myńnan astam ata-ana balarynan kóz jazyp qaldy. Qazirgi ýaqytta olardyń barlyǵy da balalarymen qaýyshty, barlyǵy din-aman.
Fakti boıynsha qylmystyq is qozǵady.
Qaladaǵy tótenshe jaǵdaı jolaýshylar poıyzdarynyń kestesine de áser etti.
25 maýsym, saǵat 12.00-degi jaǵdaı boıynsha áskerı bólim aýmaǵynda jarylystar toqtady. Degenmen, oq-dáriler saqtalatyn qoımalardyń aýmaǵynda byqsyǵan ottyń oshaqtary baıqalǵandyqtan, QR Іshki ister mınıstrligi jarylystardyń qaıtalaný qaýpi saqtalyp otyrǵanyn eskertti.
Osy ýaqytta QR Qorǵanys mınıstrliginiń áskerı-ınjenerlik qyzmetshileri Arys qalasyn mınadan tazalaý jumystaryn júrgizip jatyr. Snarıadtardyń deni turǵyn úı alqaptaryna túsken.
Arys turǵyndaryna kómek qolyn sozý maqsatynda elimizde «Arys, biz birgemiz» aktsııasy bastaý aldy.