Arysta 3 myńnan astam qurylysshy eńbek etip júr

ARYS. QazAqparat - Búgin Arys qalasynda atqarylyp jatqan jumystar, qalanyń qazirgi jaı-kúıi týraly brıfıng ótti. Jıynda shahar basshysy Murat Qadyrbek qurylys jumystary talapqa saı júrgizilip jatqanyn málimdedi, dep habarlaıdy oblys ákiminiń baspasóz qyzmeti.

«Arys qalasy kúndelikti qalypty ómirge oralyp keledi. 3 myńnan astam qurylysshy jumys istep jatyr. Olardyń arasynda jergilikti turǵyndar tartylǵan. Qazirgi tańda 340-taı úı jóndeldi. Úkimet tarapynan Arystyń árbir turǵynyna 100 myń teńge berý jóninde qaýly qabyldanǵan bolatyn. Qazirdiń ózinde arystyqtardyń 90 paıyzdan astamy osy kómekke qujat tapsyrdy. Taıaýda barlyq turǵynnyń qujaty jınalady, ıaǵnı, bul jumys aıaqtalýǵa jaqyn tur», - dedi ol.

QR Qorǵanys mınıstrliginiń ókili Qaıyrgeldi Hýsaınov qala aýmaǵy men áskerı qoımadan 20 shaqyrym radıýs qashyqtyqta tekserý, tazalaý jumystary júrgizilip jatqanyn, radıatsııa qaýpi joq ekenin baıandady. Sonymen birge qaladan 60 shaqyrym qashyqtyqta oq-dárilerdiń jarylmaǵan jalǵyz bólshekterin joıý boıynsha josparly jumys atqarylýda. Saǵat tańǵy 9 ben 18.00 aralyǵynda jarylys dybystary estilýi múmkin jáne ol turǵyndar úshin qaýipsiz ekenin jetkizdi.

Al Túrkistan oblysy polıtsııa departamenti ákimshilik basqarmasynyń basshysy Almashan Tastanbekov qala aýmaǵynda tártip saqshylary turaqty jumys júrgizip jatqanyn, turǵyndardyń quqyǵyn qorǵaý jáne qoǵamdyq qaýipsizdikti saqtaý baǵytynda jumystar jolǵa qoıylǵanyn atap ótti. Turǵyndarǵa jalǵan aqparat taratý jáne arandatý boıynsha 10 adam tergelgenin, dálelsiz derek taratý qylmys ekenin jáne mundaı qylmysqa barǵandar zań aldynda jaýap beretinin aıtty.