Arysta 271 úı qalpyna keltirildi
15:01, 06 Shilde 2019
NUR-SULTAN. QazAqparat - 2019 jylǵy 6 shildedegi jaǵdaı boıynsha Túrkistan oblysy Arys qalasynda 271 úıde qalpyna keltirý jumystary júrgizildi. Bul týraly QazAqparat Indýstrııa jáne ınfraqurylymdyq damý mınıstrligine silteme jasap habarlaıdy.
Qurylys jáne TKSh isteri komıtetiniń málimeti boıynsha, 33 úı qaıta salynady. Arysty qalpyna keltirý boıynsha aýqymdy is-sharaǵa elimizdiń barlyq óńirleri men Respýblıkalyq mańyzy bar qalalar qatysady. Qurylys alańdarynda barlyǵy 3000-nan astam qurylysshy eńbek etedi. 150 birlik arnaıy tehnıka jumyldyrylýda.
QR IIDM vıtse-mınıstri Qaıyrbek Óskenbaevtyń aıtýynsha, úılerdiń monıtorıngi men qurylys barysyn baqylaý kún saıyn júrgiziledi.
Esterińizge sala keteıik, Arys aýdanyndaǵy úılerdiń 85%-y jóndeýdi qajet etedi. Elbasynyń jáne Memleket basshysynyń tapsyrmasy boıynsha barlyq búlingen jáne buzylǵan obektiler 2019 jyldyń 1 tamyzyna deıin tapsyrylýy tıis.