Arysta 12 jasar balany qaǵyp ketken júrgizýshi izin jasyrǵan

ARYS. QazAqparat – Arysta kólik júrgizýshisi velospedpen ketip bara jatqan 12 jastaǵy balany qaǵyp ketip, oqıǵa ornynan boı tasalaǵan. Atalmysh jaıt boıynsha polıtsııa bóliminen birden jedel tergeý toby qurylyp, jedel ýákilder men patrýldik polıtsııa toby oqıǵa bolǵan jerge jetken, dep habarlaıdy QazAqparat tilshisi.

Túrkistan oblystyq PD baspasóz qyzmetiniń málimetinshe, osy keleńsiz jaǵdaı boıynsha jergilikti turǵynnyń biri polıtsııaǵa aryz túsirgen. Oqıǵa ornyna jedel jetken jedel ýákil, polıtsııa leıtenanty Ermek Eralyuly men JPQ PP tobynyń qyzmet aǵa ınspektory Bahytjan Shekerbekov, qyzmet ınspektory Bıbarys Tájen tez arada izdestirý sharalaryn júrgizdi. Qala ishindegi beınekameralardyń jazbalaryn tekserip, kýágerlerden suraq jaýaptar alyndy. Osylaısha shamamen 2-3 saǵattyń kóleminde velosıpedshini qaǵyp ketken kúdikti ustaldy. Tártip saqshylary seziktiniń kóligin tintý kezinde sómkede turǵan kúmándi zatty baıqap, tekserý júrgizedi. Nátıjesinde, paketke salynǵan hosh ıisi bar, jasyl tústi marıhýanaǵa uqsas shóp pen prıkýrsordy, qoldanýǵa tyıym salynǵan esirtki tektes birneshe preparattardy taýyp, tárkileıdi. Keıinnen anyqtalǵandaı, kúdikti Arys qalasyna qurylys jumystaryna kelgen Shymkent turǵyny bolyp shyqty.

«Búgingi tańda atalmysh jaıtqa baılanysty Arys APB-niń polıtseıleri QR Qylmystyq kodeksiniń 296-baby «Esirtki, psıhotroptyq zattarmen, sol tektestermen, prekýrsorlarmen ótkizý maqsatynsyz zańsyz jumys isteý» boıynsha tergep-tekserý amaldaryn júrgizýde. Saraptamalar taǵaıyndaldy», delingen habarlamada.