Arys turǵyny Facebook jelisinde terrorızmdi nasıhattaıtyn jazbalar taratqan
Túrkistan oblysy PD ekstremızmge qarsy is-qımyl basqarmasynyń qyzmetkerleri dinı-ekstremıstik baǵyttaǵy ıdeologııany nasıhattaıtyn tyıym salynǵan materıaldardyń ınternette taralýynyń kezekti jaıtyn anyqtap, onyń jolyn kesti.
Bul týraly oblystyq polıtsııa departamenti bastyǵynyń orynbasary, polıtsııa podpolkovnıgi Qurmanbek Sahov jetkizdi.
«Áleýmettik jelilerge monıtorıng júrgizý kezinde Facebook paraqshalarynyń birinen belgisiz adamdardyń tyıym salynǵan dinı-ekstremıstik uıymnyń ıdeologııasyn nasıhattaıtyn beınerolıkter men mátindik habarlamalar jarııalaǵanyn anyqtady.
Atalǵan materıaldar departamentte tirkelip, saraptamaǵa joldandy. Nátıjesinde sarapshylar bul materıaldarda terrorızm men ekstremızmdi nasıhattaýdyń belgileri bar ekenin rastady. Osyǵan baılanysty biz QR QK 256 -baby 2-bóligimen sotqa deıingi tergeýdi bastadyq.
Tekserý aıasynda Túrkistan oblysy PD Ekstremızmge qarsy is-qımyl basqarmasynyń jedel ýákilderi men Túrkistan oblysy boıynsha UQKD birlesip, jedel-izdestirý is-sharalary nátıjesinde kúdikti retinde Arys aýdanynyń turǵynyn ustadyq. Ustalǵan er adamnyń buryn destrýktıvti-dinı aǵymnyń jaqtaýshysy jáne sotty bolǵanyn anyqtadyq.
Onyń úıin tintý kezinde biz ártúrli kompıýterlik tehnıkany, tyıym salynǵan dinı ádebıetter, uıaly telefon men dıskilerdi tárkiledik. Qazirgi ýaqytta sotqa deıingi tergeý amaldary júrgizilýde. Kúdikti qamaýǵa alyndy. Búginde istiń mán-jaıy jan-jaqty anyqtalyp jatyr», -dep atap ótti polıtsııa podpolkovnıgi Qurmanbek Sahov.
Óz kezeginde Túrkistan oblysynyń polıtseıleri azamattarǵa QR zańnamasymen tyıym salynǵan dinı-ekstremıstik baǵyttaǵy materıaldardy, onyń ishinde áleýmettik jelilerde taratqany úshin qylmystyq jaýapkershilik qarastyrylǵanyn eskertedi.
Eger sizde osyndaı quqyq buzýshylyqtar týraly qandaı da bir aqparat bolsa, tez arada polıtsııanyń 102 nómirine habarlasyńyz.