Arys stansasynda myńnan astam jolaýshyǵa kómek kórsetildi

ARYS. QazAqparat - Jambyl oblysynda oryn alǵan tótenshe jaǵdaıǵa baılanysty temir jol qatynasy da toqtatylǵany belgili. Osyǵan oraı toǵyz joldyń toraby sanalatyn Arys stansasynda birneshe saǵat boıy aıaldap qalǵan myńnan asa jolaýshyǵa túrli kómek kórsetildi, dep habarlaıdy QazAqparat tilshisi.

Atap aıtqanda, «Aqtóbe-Almaty» baǵytyndaǵy N34 poıyzdyń 572 jolaýshysy men «Qyzylorda-Kókshetaý» baǵytyndaǵy N56 poıyzdyń 457 jolaýshysy Arys-1 temir jol vokzalynda toqtap qalǵan bolatyn.

Qala ákimi Gúljan Qurmanbekovanyń shuǵyl tapsyrmasyna oraı, bul azamattarǵa túrli kómek uıymdastyryldy. Jergilikti ákimdik qyzmetkerleri men Arys-1 temir jol stansasynyń basshylyǵy, Arys qalalyq jedel járdem stansasynyń 3 brıgadasy men jelilik ishki ister bóliminiń qyzmetkerleri jolaýshylarǵa kerekti kómekterin kórsetken. Jolaýshylarǵa as pen sý usynylyp, dezınfektsııa qyzmetkerleri sanıtarlyq talaptardyń saqtalýyn qamtamassyz etti.

Al, jergilikti kásipkerler Shymkent qalasyna jetkisi kelgen jolaýshylar úshin arnaıy kólikter uıymdastyrdy. Aıta keteıik, Arys qalasynyń ákimdigi janyndaǵy jastar resýrstyq ortalyǵynyń eriktileri men «Qolǵabys» qaıyrymdylyq qorynyń ókilderi jambyldyq turǵyndarǵa jan-jaqty kómek kórsetý baǵytynda jumystardy bastap ketti.