Arys oqıǵasyna bir jyl: Óńirden jarylý qaýpi bar 330 myń oq-dári áketildi
«Arys qalasyndaǵy áskerı qoımada bolǵan oq-dárilerdiń jarylysynan beri bir jyl ótti. Búgingi tańda jaǵdaı baqylaýda. Sonymen qatar ınfraqurylym 90 paıyzǵa qalpyna keltirildi. Áskerı qyzmetshilerdiń sheber jáne jedel túrdegi áriptestiginiń arqasynda odan da aýqymdy oqıǵalardyń aldyn aldyq», - deıdi Asylbek Satybaldınov OKQ-da ótken baspasóz máslıhatynda.
Onyń aıtýynsha jyl boıy óńirde tótenshe jaǵdaıdyń saldaryn joıýǵa jumsalǵan qosyndy otrıad jumys istep keledi. Aı saıyn saperlar men basqa da áskerı mamandar rotatsııaǵa sáıkes jumys júrgizýde.
«Іzdeý toptary, ınjenerlik barlaý men mınasyzdandyrý toptary 300 sharshy shaqyrymdy barlap, tekserip shyqty. Onyń ishinde egin aýmaqtary da, jaqyn mańdaǵy eldimekender de bar. Mobıldi jáne izdeýshi saperlik toptar jergilikti halyqtan túsken 740-qa jýyq ótinim boıynsha jumysty aıaqtady. Osynyń arqasynda oq-dárilerdiń 4,5 myń fragmentti zalalsyzdandyryldy. Vodolazdar Arys ózeniniń 30 shaqyrymdyq arnasyn tazartty. Jarylys bolǵan aýmaq aýdany 500 gektar jerdi quraıdy. 130 gektar aýmaqta betki tazartý jumystary júrgizildi», - dedi ol.
Sondaı-aq áýeden baqylaý júrgizip, eldimekenderde ornalasqan qoımalardy monıtrıngteý úshin ushqyshsyz ushatyn apparattar men kvadrokopterler qoldanylǵan. Saperlar oq-dárilerdiń 2,5 myń tonnalyq fragmentin jınap alǵan.
«Jarylatyn qaýpi joq fragmentter qaýiptiń aldyn alý úshin ashyq alańǵa jınalady. Arystan oq-dárilerdiń 380 myń fragmenti áketildi. Onyń 330 myńy jarylys qaýpi barlary. Olardy tasymaldaý úshin áskerı qaraýyldyń birge júrýimen 5 myń avtokólik reısi oryndaldy», - dedi ol.