Arys qalasynda resmı jıyn barysynda jastar tóbelesip qalǵan

ARYS. QazAqparat – Túrkistan oblysy Arys qalasynda ótken resmı is-shara barysynda jastar tóbelesip qalǵan. Bul kórinis áleýmettik jelilerge keńinen tarap ketken, dep habarlaıdy QazAqparat tilshisi.

Túrkistandyq polıtseıler áleýmettik jelide jarııalanǵan beınejazbadan buzaqylyq jasaǵan tulǵalardy anyqtaǵan.

Oblystyq PD baspasóz qyzmetiniń málimetinshe, atalǵan beınejazba monıtorıng jasaý kezinde anyqtalǵan.

Ony tekserý kezinde oqıǵa Arys aýdany ǵımarattarynyń birinde resmı is-shara barysynda oryn alyp, keıin kóshede jalǵasqany belgili boldy.

Atalǵan jaıtty polıtseıler QR QK 293-baby boıynsha tirkegen.

Artynsha jedel-izdestirý sharalary júrgizilip, tóbeleske qatysýshylardy tapqan.

Olar - eki oqý ornynyń stýdentteri, ıaǵnı jergilikti jastar bolyp shyqqan.

Tóbeleskender birden polıtsııa bólimine jetkizilgen.

«Qazirgi ýaqytta sotqa deıingi tergeý júrgizilip, oqıǵanyń mán-jaıy anyqtalyp jatyr. Sondaı-aq is-sharany uıymdastyrýshylarǵa qatysty QR ÁQBtK 425-baby boıynsha materıaldar jınalǵan. Ákimshilik hattama toltyrý úshin SEBB-ǵa joldanǵan. Sonymen qatar, bul jaıt boıynsha búgingi kúnge deıin polıtsııaǵa eshkimniń aryz-shaǵym túspegen» delingen habarlamada.