Arys qalasynda órt tolyq sóndirildi - QR Qorǵanys mınıstriniń orynbasary
Arystaǵy tótenshe jaǵdaıdan keıingi atqarylǵan jumystar men qalanyń qazirgi jaı-kúıin baıandaǵan Qorǵanys mınıstriniń orynbasary órt sóndirý sharalaryna da toqtalyp ótti.
«Qaladaǵy negizgi kósheler men alańdardyń bári tekserilip, tazalandy. Bizdiń saper mamandarymyz 500-deı snarıad qaldyǵy men jarylǵysh zattardy taýyp, zalalsyzdandyrdy. Qorǵanys mınıstrligi tarapynan turǵyndardyń qaýipsizdigin saqtaý baǵytynda tıisti sharalar atqarylýda. Endi biz qaladaǵy barlyq úıdiń aýlasyn tolyq tekseremiz. Dál qazir qalaǵa eshkimdi kirgize almaımyz. Buǵan turǵyndardyń túsinistikpen qaraýyn ótinemiz. Arystyqtardyń qaýipsizdigi basty nazarda bolýy tıis», - dedi Baqyt Qurmanbaev.
Óz kezeginde Tótenshe jaǵdaılar jónindegi komıtet tóraǵasy Vladımır Bekker qaýip bulty seıilgenin, alańdaýǵa negiz joq ekenin jetkizdi.
«Keıbir aqparat quraldarynda adamdar iz-tússiz joǵaldy degen aqparat tarady. Bul negizsiz ekenin málimdeımin. Bastapqyda kóshý barysynda turǵyndar bir-birine habarlasa almaı, qıyndyqtar kezdesken bolatyn. Qazir ol másele sheshilip, týystar da, balalar da tabylyp jatyr. Sonymen birge áleýmettik jelilerdegi iri jarylys bolatyny, qoımalardan sý jiberiletini týraly qaýesetter de jalǵan. Qazirgi tańda oblystaǵy sý qoımalary turaqty rejımde jumys istep tur jáne ol jumys rejımin ózgertý týraly jospar joq. Sondyqtan resmı rastalǵan derekterge ǵana senýlerińizdi suranamyz», - dedi Vladımır Bekker.