Arys qalasynda qaýipsizdik sharalary tolyq saqtalyp, dezınfektsııa jumystary júrgiziledi
Óńirlik jáne respýblıkalyq BAQ ókilderi qatysqan jıynda Túrkistan oblysynyń ákimi Ómirzaq Shókeev, «Nur Otan» partııasy Tóraǵasynyń birinshi orynbasary Máýlen Áshimbaev, QR Qorǵanys mınıstriniń orynbasary Baqyt Qurmanbaev, Tótenshe jaǵdaılar jónindegi komıtet tóraǵasy Vladımır Bekker, elimizdiń bas sanıtary Jandarbek Bekshın, prokýratýra jáne veterınarııa salasynyń ókilderi qatysty. Spıkerler Arys turǵyndaryn mazalap júrgen ótkir suraqtarǵa jaýap berdi.
QR Qorǵanys mınıstriniń orynbasary Baqyt Qurmanbaev Arys qalasynda órt sóndirilgenin málimdedi.
«Qaladaǵy negizgi kósheler men alańdardyń bári tekserilip, tazalandy. Bizdiń saper mamandarymyz 500-deı snarıad qaldyǵy men jarylǵysh zattardy taýyp, zalalsyzdandyrdy. Qorǵanys mınıstrligi tarapynan turǵyndardyń qaýipsizdigin saqtaý baǵytynda tıisti sharalar atqarylýda. Endi biz qaladaǵy barlyq úıdiń aýlasyn tolyq tekseremiz. Dál qazir qalaǵa eshkimdi kirgize almaımyz. Buǵan turǵyndardyń túsinistikpen qaraýyn ótinemiz. Arystyqtardyń qaýipsizdigi basty nazarda bolýy tıis»¬ - dedi ol.
Tótenshe jaǵdaılar jónindegi komıtet tóraǵasy Vladımır Bekker qaýip bulty seıilgenin, alańdaýǵa negiz joq ekenin jetkizdi.
«Keıbir aqparat quraldarynda adamdar iz-tússiz joǵaldy degen aqparat tarady. Bul negizsiz ekenin málimdeımin. Bastapqyda kóshý barysynda turǵyndar bir-birine habarlasa almaı, qıyndyqtar kezdesken bolatyn. Qazir ol másele sheshilip, týystar da, balalar da tabylyp jatyr. Sonymen birge áleýmettik jelilerdegi iri jarylys bolatyny, sý qoımalardan sý jiberiletini týraly qaýesetter de jalǵan. Qazirgi tańda oblystaǵy sý qoımalary turaqty rejimde jumys istep tur jáne ol jumys rejimin ózgertý týraly jospar joq. Sondyqtan resmı rastalǵan derekterge ǵana senýlerińizdi suranamyz», ¬- dedi ol.
Al elimizdiń bas sanıtary Jandarbek Bekshın Arys qalasynda radıatsııanyń mólsheri turaqty deńgeıde ekenin aıtty.
«Eń birinshi bizdiń mamandar Arys qalasynda dezınfektsııa jumystaryn júrgizedi. Qoǵamdyq oryndar, qoqys konteınerleri, nysandar tolyq tazalanady. Qaladaǵy aýyz sý júıesi qatań qadaǵalanady. Sý quramy, qubyrlar tekseriledi. Evakýatsııalyq oryndarda da mamandarymyz jumys istep jatyr. Jalpy Túrkistan oblysynda epıdemıologııalyq jaǵdaı turaqty», - dedi.
Sondaı-aq baspasóz máslıhatynda veterınar mamandar Arystaǵy úı aýlasynda qalǵan tórt-túlik boıynsha jumys júrgizetini aıtyldy. Ólgen mal zalalsyzdandyrylyp, zańǵa sáıkes ótemaqy berý joldary qarastyrylady.
Oblys ákimi Ómirzaq Shókeev aldaǵy úsh kúnde evakýatsııalyq qabyldaý ortalyqtarynyń jumysy kúsheıtilip, gýmanıtarlyq kómek berý sharasy jalǵasatynyna toqtaldy. Osy ıgi iske atsalysyp júrgen barsha azamattarǵa alǵysyn aıta kele Arys qalasyndaǵy nysandar qalpyna keltirilip, turǵyndardyń jaǵdaıy jasalatynyn jetkizdi.