Arýjan Saın jańa qyzmetinde qandaı jumystar atqaryp úlgergenin aıtty
Bul týraly ol Facebook-tegi paraqshasynda jazdy.
«18 maýsym kúni men QR Bala quqyqtary jónindegi ýákil qyzmetine taǵaıyndaldym. Atqarylǵan jumystar men qol jetken nátıjeler jóninde aı saıyn ashyq esep berip turýǵa bekindim.
Shildede meniń atyma árqaısysy qyıǵyly taǵdyrǵa toly 28 hat kelip tústi. Birinen tirlikten túńilgen jannyń janaıqaıy sezilse, birinen ómirlik qıyn túıindi sheshe almaı qamyqqan jannyń úni estiledi. Alaıda, olardyń barlyǵy bizder – úlkender sheshýge tıisti problemalar», - dedi ol.
A.Saın 12 isti óziniń jeke baqylaýyna alǵan.
Bul ister boıynsha barlyq ókiletti organdarmen birlesken qyzý jumystar júrip jatyr.
«Eń aldymen, sóıleýdiń kohlearlyq ımplanttarynyń protsessorlaryn aýystyrýdyń qoldanystaǵy tártibimen kelispeıtin bir top ata-ananyń úndeý meniń atyma kelip tústi. Máseleni obektıvti túrde qaraý úshin men QR Eńbek jáne halyqty áleýmettik qorǵaý vıtse-mınıstri Svetlana Jaqypovanyń atyna qoldanystaǵy zańdyq negizderdi túsindirýin ótinip, hat joldadym.
Ekinshiden, shildeniń sońǵy kúnderinde Adam quqyǵyn qorǵaý jónindegi Qazaqstandyq halyqaralyq bıýroda ótken baspasóz máslıhatynda Túrkistan oblysynyń mektep-ınternatynda tárbıelenip jatqan balalardyń quqyqtary buzylǵanyn aıǵaqtaıtyn derekter jarııalady. Osy maqsatta QR Bala quqyqtary jónindegi ýákildiń atynan Túrkistan oblysynyń prokýroryna balalar quqyqtarynyń tolyq saqtalýy men mektep-ınternattyń qyzmetiniń zańdylyǵyn keshendi túrde tekserý týraly resmı habarlama joldadym», - dedi ol.
Sonymen qatar, Arýjan Saın Atyraý qalasy ákimdigine «Baqytty Otbasy» baǵdarlamasyna qatysýǵa nıetti múgedek balalary bar januıalarǵa joldama berýden bas tartqan qyzmetkerlerdiń áreketterine zańdyq turǵyda baǵa berýlerin surap, hat joldaǵan.
Mıkrotııa syrqaty boıynsha sátsiz ota jasalǵan qyzynyń jaǵdaıyn aıtyp, shyryldaǵan ananyń haty negizinde dárigerdiń qyzmetin tekserýdi talap etip, memlekettik organdarǵa júgingen.
«Men elimizdiń Bilim jáne ǵylym mınıstrligine sheteldikterdiń bala asyrap alý máselesin túsindirip berýlerin surastyryp, hat jazdym. Bul másele qazaqstandyq balalar shetelge satylyp jatyr degen aqparattar tarap, qoǵamdyq sananyń alańdaýshylyǵy baıqalǵandyǵynan týyndap otyr. Qoǵam aldynda jańa týǵan nárestelerdiń retınopatııasy týraly problema turǵaly da kóp ýaqyt boldy. Búgingi kúni ol adam shoshıtyndaı dárejege jetti. Meniń Densaýlyq saqtaý mınıstrine jazǵan hatym týra osy másele týraly.
Barlyq múddeli memlekettik organdar Ýákilmen birlese jumys jasaýǵa nıetti. Ásirese, búgingi tańda Densaýlyq saqtaý, Bilim jáne ǵylym mınıstrlikterimen jáne ózge de vedomstvolarmen birigip jumys jasaýdyń alǵysharttaryn ázirleýdemiz. Tek osylaı ǵana bizdiń árbir qadamymyz tıimdi bolatynyna senimdimin», - dedi ol.