Arýjan Saın: Múgedek balalardyń ómirin jaqsartý jol kartasy jaı sóz bolyp qalmaýy kerek
«Jyl eshkimge ońaı bolǵan joq. Pandemııanyń búkil eldi ábigerge salǵany belgili. Áıtse de bul balalardyń densaýlyǵy men quqyǵyn qorǵaý máselesine kóleńkesin túsirmeýi kerek. Búgingi jıynǵa oblys ákimderiniń orynbasarlary men basqarma basshylarynyń qatysyp otyrǵanyn paıdalanyp, myna máselege basa nazar aýdarý kerektigin aıtqym keledi. Óńirlerdegi komıssııalar nazardan tys qaldyryp jatqan ister bar», - dedi Arýjan Saın QR Úkimeti janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komıssııanyń otyrysynda.
Onyń aıtýynsha basty mindet – balalardyń múgedektigin tómendetý. Arýjan Saın bul jaıly ártúrli otyrysta aıtyp kele jatqanyn tilge tıek etti.
«Óńirlerde tamyzda qol qoıylǵan jol kartasyna kóp kóńil bólindi. Ol 2021 jyly iske asyrylady. Biz, balalardyń ata-analary, úkimettik emes uıymdar atalmysh jol kartasynyń sóz júzinde qalý qaýpine alańdaýshylyq bildiremiz. Múgedek balalardyń ómirin jaqsartýǵa baǵyttalǵan jol kartasy kóbinese balalardyń múgedektiginiń aldyn alýǵa, densaýlyǵynyń myǵymdyǵyn saqtap qalýǵa baǵyttalǵan. Sol sebepti jergilikti jerlerde óte aýqymdy jumystar atqarylýy kerek», - dedi ol.
Arýjan Saın óz sózinde bala qursaqta jatqannan bastap dúnıege kelgennen keıin nárestede bolýy múmkin fýnktsıonaldyq shekteýler anyqtalýy kerektigin jetkizdi.
«Soqyrlyq boıynsha múgedektikti azaıtý úshin sizder (oblys ákimderiniń orynbasarlary men basqarma basshylaryna) oftalmologtardy oqytyp, perınıtaldy ortalyqtardyń bári tıisti qurylǵylarmen satyp alýlaryńyz kerek bolatyn. Qazirgi ýaqytta meniń qolymda osy tapsyrmany oryndaǵany týraly eshqandaı aqparat joq. Sol sebepti VAK-tardyń bári osy máseleni basa nazarǵa alýdy suraımyn», - dedi ol.