Arýjan Saın: Ár balanyń kem degende eki úıirmege bara alatyn múmkindigi bolýy kerek
«Balalar birin-biri sabap, kózin shyǵaryp, tipti bir-birin órtep jatqan jaǵdaılar kezdesedi. Biri jan-janýardy, maldy qınap, ekinshisi tipti seksýaldyq áreketterimen kózge tústi. Ókinishke qaraı, osylaı ýaqyt ótkizip, qalyptasyp keledi. Al negizinen balanyń ýaqyty damý, órkendeý maqsatyna jumsalýy tıis. ıAǵnı, bala óz ýaqytyn sportpen, ǵylymmen, ónermen ótkizýi tıis. Ózin-ózi jetildirý jolynda balaǵa qajettiniń bári qoljetimdi bolýy kerek. Ár aımaqta bıznesti jumyldyrý jolymen Mádenıet úıleri, Sport saraılary, bilim berý uıymdarynda úıirmeler tolyqqandy jumys istep turýy kerek», - dedi Arýjan Saın OKQ-da ótken baspasóz máslıhatynda.
Onyń aıtýynsha, bul turǵyda bári tegin degen túsinik bolmaýy kerek. Sebebi, tegin degen sózdiń artynda búkil qazaqstandyqtardyń salyǵy jatyr.
«Biz, azamattardyń bári, salyq tólep jatyrmyz. Ol qarajat memlekettiń ıeliginde. Qasym-Jomart Kemeluly da, Nursultan Ábishuly da qarajattyń halyqqa jetýi tıis ekenin aıtqan bolatyn. Qarajatty ımıdjdik sharalarǵa, kontsertter men merekelerge jumsaýdy toqtatqan abzal. Onyń bárine qyrýar qarajat jumsalýda», - dedi ol.
Arýjan Saın osyǵan baılanysty jergilikti atqarýshy organdar men aımaq basshylaryna úndeý tastady.
«Qarjylyq saıasattty qaıta qarap, mundaı sharalardyń bárin qysqartyp, odan únemdelgen qarajatty balalarǵa jumsasańyzdar, bir jyldan keıin-aq balalar óner kórsetetin eń kórkem de úzdik sharalardy baqylaı alasyzdar. Balalar ol sharalarda bir-birimen sportta, ónerde saıysatyn bolady», - dedi Arýjan Saın.
Onyń aıtýynsha, bul baǵytta naqty jospar da bar.
«Biz Bilim jáne ǵylym mınıstrligimen balalardyń jan sanyna qaraı qarjylandyrý boıynsha tyǵyz baılanysta jumys júrgizip jatyrmyz. Ol jospar boıynsha ár balaǵa kem degende eki úıirme qoljetimdi bolýy tıis. Osylaı etsek, qarajat balalarǵa jumsalyp, ár bala súıikti isimen aınalysýǵa múmkindik alar edi», - dedi ol.