«Arý» qyzdar qan tapsyrdy

ASTANA. 27 sáýir. QazAqparat - Búgin elordada «Astana» medıtsınalyq ýnıversıtetinde «Arý» qyzdar lıgasynyń» uıymdastyrýymen qaıyrymdylyq aktsııasy ótti.

Bul joba stýdent jastardy Qazaqstandaǵy qan donorlyǵy máselesine kóńil aýdartý úshin jasalýda. Atalmysh shara barysynda barlyǵy 55 lıtr qan jınaý josparlanýda. 25 sáýirde bastalǵan aktsııaǵa 100-den astam stýdent qan tapsyryp úlgergen. Taǵy 60-70 adam kezekte tur. 

«Jastar top-toppen kelip, bul sharaǵa belsendi túrde aralasýda. Qaıyrymdylyq aktsııasynda jınalǵan donorlyq qan №2 balalar aýrýhanasyna, aýyr dertke shaldyqqan balalarǵa arnalady. Biz - bolashaq dárigerler bul máselege birinshi bolyp kóńil aýdarǵymyz keldi», - deıdi uıym músheleri.      

«Arý» qyzdar lıgasy «Astana» medıtsınalyq ýnıversıtetiniń stýdent qyzdary bastaǵan uıym. Oǵan 140 arý múshelikke engen.