Artynda izdeýshisi, suraýshysy bar tulǵanyń esimi eshqashanda kómeskilenbeıdi - Z. Ahmetova

ALMATY. QazAqparat- Artynda izdeýshisi, suraýshysy bar tulǵanyń esimi eshqashanda kómeskilenbeıdi. Búgin Almatyda B. Momyshuly atyndaǵy respýblıkalyq áskerı mektep-ınternatynda Keńes Odaǵynyń Batyry, qaharman qolbasshy Baýyrjan Momyshulyna arnalǵan eskertkish-músinniń ashylý saltanatynda Baýkeniń kelini, jazýshy Zeınep Ahmetova osylaı dedi.

«Qandaı uly adam bolmasyn, artynda izdeýshisi, suraýshysy bolmasa, ýaqyt óte kele atynyń kómeskilenetini belgili. Bul - tabıǵat zańy. Biraq, Allaǵa shúkir, atanyń esimi ózi ómirden ozsa da eshqandaı kómeskilengen joq, Qaıta jańǵyryp, jańaryp keledi. Ata jaıynda kitaptar jazylyp, kóshelerge esimi berilip, eskertkishter qoıylyp jatyr. Bul, halqynyń namysyn tý etip ustaǵan, alty alashtyń ardaqtysy atanǵan batyrdyń rýhyna jasalyp jatqan qurmet. Qara shańyraqtyń atynan búgin myna eskertkishtiń jasalyp, ornatylýyna jan-jaqtan atsalysqan azamattarǵa alǵysymyzdy bildiremiz» - dedi Z. Ahmetova.

Sonymen qatar, Zeınep apa «QazAqparat» tilshisine Baýkeniń eskertkishi ózine qatty unaǵanyn jetkizdi.

«Eskertkish jasalyp jatqan kezde, onyń alǵashqy nobaılary, keskinderi bizge kórsetildi. Biz sýretterdi kórsetip, aqyl-keńesimizdi berip otyrdyq. Sondyqtan bul eskertkish-músin maǵan óte unaıdy. Atanyń eskertkishteri osy kezge deıin basyndaǵy papahasymen birge jasalyp keldi. Al búgin tuńǵysh ret, myna músinde atamyz jalańbas kúıinde beınelengen. Maǵan unady», - dedi Z. Ahmetova.

Aıta ketelik, eskertkish-músindi músinshi Bekejan Albosynov jasaǵan.