Artýr Shýshenachev «Qaırattan» ızraıldik klýbqa aýysty

<p>ASTANA. KAZINFORM &ndash; Qazaqstandyq Artýr Shýshenachev Almatynyń &laquo;Qaıratynan&raquo; ızraıldik &laquo;Hapoel&raquo; (Beer-Sheva) komandasyna aýysty.</p>

«Qaırat» fýtbol klýbynyń baspasóz qyzmetinen málim etkenindeı, qos komanda 25 jastaǵy shabýylshynyń transferi boıynsha kelisimge kelgen.

«Taraz» fýtbol klýbynyń túlegi Artýr «Qaıratqa» 2017 jyldyń kókteminde qosylyp, sol maýsymda negizgi komanda sapynda alǵashqy matchyn ótkizdi. 2018 jyly komandamen birge Qazaqstan kýbogin jeńip aldy. Al 2020 jyly «Qaırat» quramynda Qazaqstan chempıony atandy.

2021 jyly ol eýrokýboktiń toptyq kezeńinde debıýt jasady. Qazaqstan kýboginiń fınalynda sheshýshi gol soǵyp, komandanyń atalǵan trofeıdi ekinshi ret jeńip alýyna kómektesti. Sol jyly barlyq resmı matchta 23 gol soǵyp, qazaqstandyq fýtbolshylar arasynda úzdik surmergen atandy.

A.Shýshenachev «Qaırat» sapynda barlyǵy 128 match ótkizip, 45 gol soǵyp, 9 nátıjeli pas berdi.

Transfermarkt málimetine qaraǵanda, Artýr Shýshenachev «Qaırattan» 500 myń eýroǵa satyp alynǵan.

Ol 2021 jyldan Qazaqstan ulttyq quramasyna shaqyryla bastady.