Artsport jobasynyń qarjysyn jymqyrǵan 4 adam sottalǵan

ASTANA. QazAqparat – Sybaılas jemqorlyqqa qarsy is-qımyl agenttiginiń 2022 jylǵy sybaılas jemqorlyqqa qarsy is-qımyl týraly ulttyq baıandamasynda 2021-2022 jyldary iske asyrylǵan «Artsport» jobasynyń jemqorlyq faktileri týraly málimetter keltirilgen, dep habarlaıdy QazAqparat tilshisi.

«Úıirmeler men sektsııalardy memleketten qarjylandyrý jolymen buqaralyq balalar sporty men shyǵarmashylyǵyn damytýǵa baǵyttalǵan «Artsport» jobasy sheńberinde anyqtalǵan sybaılas jemqorlyq shemalary qoǵamda úlken rezonans týdyrdy.

Jan basyna shaqqandaǵy qarjylandyrýǵa shamamen 43 mlrd teńge bólindi (2021 jyly – 5,8 mlrd teńge, 2022 jyly – 37 mlrd teńge). Baǵdarlama iske asyrylǵan qysqa merzimniń ishinde 11 adamǵa qatysty 19 qylmystyq is tirkeldi. 6 adamnyń isi sotqa berilip, onyń 4-eýi sottaldy», - dep jazady agenttik mamandary.

Agenttik málimeti boıynsha, sybaılas jemqorlyq táýekelderi baǵdarlamaǵa bólingen qarajatty ıgerýdiń barlyq kezeńinde anyqtalǵan.

«Bıýdjettiń merziminen buryn ıgerilýine baılanysty joba eki ret toqtap qaldy.

Sondaı-aq «ArtSport» elektrondyq platformasynda qujattardy berý jáne sabaqqa qatysýdy esepke alýdy tsıfrlandyrýdyń jetkiliksizdigi anyqtaldy. Júıeniń shalaǵaılyǵy «ómirde joq» jandardy engizýge múmkindik berdi», - dep jazylǵan ulttyq baıandamada.