Artsport: Qyzylordada úıirmege qatyspaǵan 5740 bala úshin 127 mln qarajat jymqyrylǵan
Bul málimetter oblys ákiminiń birinshi orynbasary Danııar Janalınovtnyń tóraǵalyǵymen ótken quqyq qorǵaý organdarynyń jaýapty ókilderi, tıisti salalyq basqarma basshylary qatysqan jıynda belgili boldy.
Onda atalǵan baǵdarlamany zerdeleý barysy pysyqtaldy. Aımaq basshysynyń tapsyrmasyna sáıkes oblystyq prokýratýra janyndaǵy quramynda quqyq qorǵaý organdary bar jumysshy toby «Artsport» baǵdarlamasymen jumys jasaıtyn ónim berýshilerdi tekserýde.
— Búginde jumysshy top 19 sýbektiniń jumysyn saralap, 127,2 mln.teńge qarajatty zańsyz ıemdený deregin anyqtaǵan. Anyqtalǵan buzýshylyqtardyń 106,1 mln teńgesi mádenıet salasyna, 21,1 mln.teńgesi sport salasyna tıesili. Tıisti basqarmalarmen birge jergilikti atqarýshy organdardyń, qala jáne aýdan ákimdikteriniń kómegimen «Damý bala» platformasyna tirkelgender arasynan ata-analary 5740 balanyń shyn máninde shyǵarmashylyq úıirmeler men sporttyq sektsııalarǵa qatyspaıtynyn rastap otyr. Kúsheıtilgen zerdeleý nátıjesinde ónim berýshiler tarapynan jalǵan tirkelgen 13 731 bala tizimnen alynyp tastalǵan, — dep málim etti oblys ákimdiginen.
Aıta ketý kerek, mádenıet jáne sport basqarmalary zerdeleý qorytyndysy shyqqan soń, 125 kásipkermen kelisim-shartty birjaqty buzǵan. Onyń ishinde 55 kásipker óz erkimen jumysyn toqtatqan. Qazir 16 kásipker zańsyz ıemdengen qarajatyn óz erkimen bıýdjetke qaıtarýda, bul baǵyttaǵy jumys áli de júrýde.
Jyl kóleminde júrgizilgen monıtorıng nátıjesinde bul maqsatqa qaralǵan qarjynyń 3 mlrd teńgeden astamy bıýdjetke qaıtaryldy. «Artsport» baǵdarlamasyn zerdeleý barysy oblys ákimdiginde apta saıyn turaqty qaralatyn bolady.
Eske salsaq, budan buryn Qyzylordada pırotehnıkalyq ónimderge qatysty 12 ákimshilik quqyq buzýshylyq anyqtaldy.