ArtSport baǵdarlamasy boıynsha jezóksheler men sýtenerler jumys istegen - Májilis depýtaty

ASTANA. QazAqparat – ArtSport baǵdarlamasy aıasynda prıton uıymdastyryp, sotty bolǵandar balalardy sportqa baýlyǵan. Atalǵan máseleni Májilis depýtaty Nartaı Sársenǵalıev kóterdi, dep habarlaıdy QazAqparat tilshisi.

Búgin Májilistiń áleýmettik-mádenı damý komıtetiniń otyrysynda ArtSport baǵdarlamasyn jetildirý máseleleri qaraldy.

Jıyn barysynda depýtat Nartaı Sársenǵalıev kelesi máseleni kóterdi.

«Elimizdiń 6 óńirinde ArtSport baǵdarlamasy boıynsha prıton uıymdastyrǵany úshin sottalǵan adamdar jumys istegen. Elimiz boıynsha osy sekildi 20 fakti tirkeldi. Burynǵy jezóksheler men sýtenerler qalaısha balalarmen jumys istedi? Memlekettik organdar qaıda qarady? Osy jaıttan keıin balalarmen psıhologtar jumys istedi me? Balalarǵa olardy burynǵy qylmyskerler jattyqtyrǵanyn qalaı túsindiremiz? – degen saýal joldady depýtat.

Saýalǵa Bas prokýratýranyń qoǵamdyq múddelerdi qorǵaý qyzmetiniń aǵa prokýrory Dýlat Áshirbekov jaýap berdi.

«Elimiz boıynsha uıǵarymdarmen 38 akt shyǵaryldy. Mádenıet jáne sport mınıstriniń orynbasary óz erkimen jumystan shyqty. Sonymen qatar atalǵan faktiler boıynsha komıtet basshysy jumystan bosatyldy. Óńirlerge kelsek, Almaty, Shymkent, BQO, ShQO, Qaraǵandy jáne Mańǵystaý oblysy bar. Almaty men Shymkentte olar qazir jumys istemeıdi, al basqa óńirler boıynsha aqparat suratamyz», - deıdi ol.