Artsport baǵdarlamasy bolmaıdy, kompanııalarǵa lobbı jasalmaıdy – mınıstr úıirmeler jumysy týraly

ASTANA. QazAqparat – QR Mádenıet jáne sport mınıstri Ashat Oralov balalardy úıirmemen qamtý jumystary qalaı júretinin túsindirdi, dep habarlaıdy QazAqparat.

«Artsport baǵdarlamasy joq, sport jáne mádenı úıirmelerdi qarjylandyrý boıynsha memlekettik baǵdarlama bar. Ótken jyly osy baǵdarlamany oryndaýshy «Artsport» aqparattyq júıesin iske qosqan edi. Endi jańa qaǵıdalar men jańa standart ornatyldy. Ótken jylǵy kemshilikterdi eskere otyryp, bıyl 86 mlrd teńgeden astam qarjy bólindi», - dedi mınıstr Úkimet kýlýarynda.

Onyń aıtýynsha, úıirmelerge 560 myń balany qamtý josparlanǵan. Ákimshilendirý, qarajat bólý jumystaryn jergilikti atqarýshy organdar, ıaǵnı ákimdikter júrgizedi. Konkýrstardy sport jáne mádenıet basqarmalary júrgizedi.

«Qazir túrli óńirde túrli aqparattyq júıeler bar. Biraq biz júıeli sharalardy qolǵa aldyq, ashyqtyq bolýy úshin barlyq bazalardy biriktiremiz. Basty mindet – barlyq sheshimder balalar paıdasyna, ashyqtyq maqsatynda qabylanady. Bul óte mańyzdy. Qandaı da bir kompanııa lobbıine jol berilmeıdi. Eń bastysy – balalarǵa úıirmelerdi qoljetimdi etý», - dedi Ashat Oralov.