ArtSport arqyly 211 myńnan astam bala shahmat úırenip júr

ASTANA. QazAqparat – Qazaqstan shahmat federatsııasynyń birinshi vıtse-prezıdenti Dármen Sádýaqasov elimizde shahmat oıynynyń tanymal ekenin, ásirese balalar arasynda suranystyń kóptigin aıtady, dep habarlaıdy QazAqparat tilshisi.

«Mádenıet jáne sport mınıstrliginiń baǵalaýy boıynsha elimizde shahmat oıyny tanymal ári suranysqa ıe. Búginde 211 myńnan astam bala «ArtSport» baǵdarlamasy boıynsha shahmat úırenip júr. Biraq, bul jerde basqa formatta úıretiledi, desek te elimizde shahmat óte tanymal», - dedi Dármen Sádýaqasov ortalyq kommýnıkatsııalar alańynda ótken baspasóz máslıhatynda.

Onyń aıtýynsha, kóptegen ata-ana qazirgi zamannyń keń múmkindigin paıdalana otyryp, balasyna ınvestıtsııa quıǵysy keledi.

«Osy oraıda, balanyń oılaý qabileti men logıkasyn damytý jáne zeıinin ashýda shahmat paıdaly. Atalǵan oıyn este saqtaý jáne synı turǵydan oılaýdyń taptyrmas quraly. Sondyqtan da, ata-analardyń deni balasyn shahmatqa bergisi keledi», - deıdi ol.

Buǵan deıin habarlaǵanymyzdaı, shahmat 1-4 synyp oqýshylary arasynda fakýltatıv pán retinde engizilmek. Búginde atalǵan joba keıbir óńirlerde pılottyq joba retinde aprobatsııadan ótip jatyr. Eger joba sátti júzege assa, onyń aıasy keńeıtiledi.

Aıta keteıik, shahmattyń mektepterde fakýltatıv pán retinde engiziletindigine baılanysty kadrlar daıarlaý máselesi qarastyryldy. Naqty aıtqanda, pedagogıkalyq joǵary oqý oryndary shahmat muǵalimin daıarlaýy múmkin.