Arshalyda «Rýhanı jańǵyrý» baǵdarlamasy sheńberinde 164 joba júzege asyrylǵan

KÓKShETAÝ. QazAqparat – Aqmola oblysynyń Arshaly aýdanynda «Rýhanı jańǵyrý» baǵdarlamasy sheńberinde 164 joba júzege asyrylǵan. Bul týraly óńirlik kommýnıkatsııalar qyzmetinde ótken brıfıngte aýdan ákimi Talǵat Muhanbedjanov aıtty, dep habarlaıdy QazAqparat tilshisi.

Ákimniń sózinshe, bıylǵy Jastar jyly aıasynda «Imanjúsip Qutpanuly: taǵdyr taǵylymy» atty oblystyq jas aqyndar baıqaýy ótkizilipti. Sondaı-aq, aýdan turǵyndary «Aqmola juldyzdary» oblystyq kórkemónerpazdar baıqaýyna, «Arshaly daryny» ǵylymı jumystar baıqaýyna da belsene qatysqan.

«Rýhanı jańǵyrý» baǵdarlamasy – ıdeologııalyq mańyzdy strategııalyq qujat. Munda qoǵamymyzdyń damýy, ultymyzdyń qalyptasýy, salt-sanamyz ben qazaqstandyq mádenıetti saqtaý joldary naqty aıtylǵan. «Týǵan jer» arnaıy baǵdarlamasy aıasynda metsenattardyń qarjylaı kómeginiń arqasynda 3 áleýmettik nysan qaıta jańartyldy. Ijevsk aýylyndaǵy dárigerlik ambýlatorııaǵa kúrdeli jóndeý júrgizildi. Barlyq áleýmettik jobalarǵa qoldaý kórsetetin metsenatymyz Ibragım Janǵorazovtyń esimin erekshe atap ótkim keledi. Kásipker jas mamandardy qoldaý maqsatymen eki kóppáterli turǵyn úıdi kúrdeli jóndeýden ótkizdi», – dedi Talǵat Muhanbedjanov.

Sonymen qatar, aýdan ákimi kásipker Aleksandr Gýsevtiń de «Týǵan jer» baǵdarlamasyn iske asyrýǵa atsalysyp, aýdandaǵy balabaqshany kúrdeli jóndeýden ótkizýge qarajat bólgenin erekshe atap ótti.

Brıfıngte «Eńbek-1» jaýapkershiligi shekteýli seriktestigin basqaryp otyrǵan metsenat Baǵdat Amangeldiqyzynyń esimi de ataýsyz qalmady. Ol Konstantınovka aýyldyq okrýgine jedel járdem kóligin satyp áperipti.

Búgingi tańda aýdanda kıeli jerlerdi qalpyna keltirý jumystary qarqyndy júrgizilýde. «Kıeli jerler geografııasy» arnaıy jobasy aıasynda osy óńirden shyqqan ataqty aqyn Imanjúsip Qutpanulynyń ómirin kópshilikke nasıhattaý maqsatynda sharalar qolǵa alynǵan. Sondaı-aq, aýdanda aty ańyzǵa toly Aıýly shoqysy men Jylantas dep atalatyn kıeli oryndar bar. Halyq aýzynda Kúzetshitaý dep este qalǵan Aıýly shoqysy tabıǵı eskertkishi Arshaly aýdanynyń Konstantınov selolyq okrýginiń aımaǵynda ornalasqan. Jońǵar basqynshylyǵy kezderinde Aıýly shoqysy qorǵanys beketi bolǵan desedi. Aıýly shoqysynda qaraýyldaǵan kúzetshi ońtústik-shyǵys jaqtan kele jatqan jaýdy kórip ot jaǵyp belgi beretin, al aýyl turǵyndary otty kórip úńgirlerge tyǵylǵan eken.

«Jalpy, aýdanda kıeli jerler barshylyq. Búgingi kúni olardy zerttep, nasıhattaý basty jumysymyz. Osy baǵytta «Rýhanı jańǵyrý» baǵdarlamasy aıasynda jalpy somasy 70 mıllıon teńgeni quraıtyn 164 joba iske asyryldy», dep tolyqtyrdy aýdan ákimi.