Arshaly aýdanynda qandastarǵa arnalǵan agroqalashyq salý qolǵa alyndy
Qaýymdastyqtyń málimetinshe, búgingi kúni geodezııalyq zertteýler negizinde jer telimderiniń shekarasy anyqtalyp, olardy naqtylaý júrgizildi, joldar men basqa da ınjenerlik jeli salýǵa belgi qoıyldy. Jer telimderi sheginde mejeleý jumystary qolǵa alyndy.
Úılerdiń qurylysy osy jyldyń 15 mamyrda bastalady. Qazirgi esepteý boıynsha, agroqalashyqtaǵy alǵashqy úıler bıyl kúzde boı kóteredi.
«Elbasy, Dúnıejúzi qazaqtary qaýymdastyǵynyń tóraǵasy N.Á. Nazarbaevtyń shet elderdegi qazaqtardy tarıhı otanyna ákelý, qazaqstandyqtardyń áleýmettik qorǵalmaǵan sanattarynyń turǵyn úı máselelerin sheshý jáne jańa jumys oryndaryn ashý týraly tapsyrmasy aıasynda Dúnıejúzi qazaqtarynyń qaýymdastyǵy men «Otandastar qory» KeAQ budan úsh jyl buryn jergilikti turǵyndar men qandastar úshin «Asar» ádisin qoldanyp, «Turǵynúı jáne jumys» qaǵıdasy boıynsha Aqmola men Túrkistan oblystarynda kottedj qalashyǵyn salýdyń eki pılot jobasyn usynǵan edi», delingen habarlamada.
Aqmola oblysynyń Arshaly aýdanynda 196 gektar jer alynyp, sondaı-aq, Aqmola oblysy men Nur-Sultan qalasy ákimdikteriniń tıisti qurylymdarymen 1 282 kottedj salýǵa kelisildi.
Jerdiń ıeleri – EKSPO-2017 kórmesiniń burynǵy qurylysshylary, negizinen ońtústik oblystardan kelgen jáne eldiń soltústik aımaqtarynda qalýǵa, turýǵa jáne jumys isteýge nıet bildirgen qandastar.
6-8 myń turǵynǵa arnalǵan eldimeken mańynan úsh jarym myń jumys ornyn ashý qaralǵan. Onda 300 gektar jylyjaı, aýylsharýashylyq ónimin satatyn kóterme bazar, jylqy, iri qara men usaq maldy ósirip, bordaqylaý ortalyǵy bolady. Bul joba Nur-Sultan qalasyn sapaly jáne qoljetimdi aýyl sharýashylyǵy ónimderimen qamtamasyz etýge úles qosady.
Jobanyń biregeıligi – úılerdi satyp alý men salýǵa memleket tarapynan eshqandaı qarajat jumsaýdy qajet etpeıdi. Jer qazirdiń ózinde satyp alynǵan, úılerdi jer ıeleriniń ózderi «Asar» ádisi boıynsha salady ári bul úı qunyn edáýir tómendetip, sapasyn arttyrady.
«Túrkistan oblysynyń Keles aımaǵynda osyndaı shaǵyn aýdan salý úshin 300 gektar jer jáne aýyl sharýashylyǵyna paıdalanylatyn 180 gektar sýarmaly jer bólý týraly másele sheshildi. Daıyn ınfraqurylymy bar alǵashqy 24 gektar jer jaqyn kúnderi bólinedi. Qazirdiń ózinde Ózbekstan tarapymen sýarmaly sýmen qamtamasyz etý týraly kelisim jasaldy, bul úshin burynnan bar aryq arnasyn tazartý bastaldy. Munda da qandastardy úımen jáne aýylsharýashylyq ónimin óndiretin baǵyttaǵy jumyspen qamtý qarastyrylǵan», delingen habarlamada.
Qaýymdastyqtyń túsindirýinshe, shekaralas Ózbekstan turǵyndary tarapynan et pen sút ónimderine degen suranystyń joǵary ekendigin eskere otyryp, bul joba eksportqa baǵyttalǵan jáne shaǵyn otbasy mal fermasyn qurýǵa beıimdelgen. Ár qojalyqqa úı men aýla sharýashylyǵyn salý úshin 25 sotyqqa deıingi jer telimi bólinedi dep josparlanyp otyr. Otbasylyq qojalyq, ónimderin óńirde úlken suranysqa ıe halal negizinde óndiretin bolady.
Bolashaqta mundaı agroqalashyqty Pavlodar, Jambyl, Aqtóbe, Atyraý, Shyǵys Qazaqstan, Batys Qazaqstan, Qaraǵandy, Qostanaı, Soltústik Qazaqstan oblystarynda salý josparlanyp jatyr.