«ArselorMıttalTemirtaý» tarıhynda qandaı apattar boldy

<p>Búgin Qazaqstan kenishinde kezekti apat boldy. Qaraǵandy oblysyndaǵy &laquo;ArselorMıttalTemirtaý&raquo; AQ-ǵa qarasty Kostenko atyndaǵy shahtada órtten qaza tapqan kenshiler sany <a href="https://kaz.inform.kz/news/kostenko-atindagi-shahtada-kaza-tapkan-kenshler-sani-21-ge-zhett-1b39d1/" target="_blank" rel="noopener">21-ge</a> jetti, 23 kenshi áli de jer astynda. Memleket basshysy Qasym-Jomart Toqaev oqıǵanyń mán-jaıyn anyqtap, tıisti sheshim qabyldaý úshin apat ornyna bardy. Buǵan deıin de &laquo;ArselorMıttalTemirtaý&raquo; kompanııasyna birneshe márte aıyppul salynyp, qaýipsizdik talaptarynyń saqtalmaǵanyna qatysty syn aıtylǵan. Keıingi jyldary óndiristik apattyń kóbeıýi de osyny aıǵaqtaıdy. <a href="Kazinform" target="_blank" rel="noopener">Kazinform</a> &laquo;ArselorMıttalTemirtaý&raquo; tarıhynda qandaı apattar bolǵanyna sholý jasady.&nbsp;</p>

Táýelsizdik jyldary shahtalarda bolǵan apattarǵa nazar aýdarsaq, el tarıhyndaǵy eń irisi «Arselor Mıttal Temirtaý» AQ Shahtınsk qalasyndaǵy Lenın atyndaǵy shahtasynda bolǵanyn baıqaımyz. Máselen, atalǵan jerde 2006 jyly metan jarylyp, saldarynan 41 adam kóz jumdy. Al 1995 jyly dál osyndaı apattyń kesirinen 13 kenshi qaza tapqan edi. 

Lenın atyndaǵy shahtada metan jaryldy (1995 jyl) 

1995 jyldyń 24 qarashasynda Qaraǵandy oblysy Shahtınsk qalasynda bolǵan tótenshe jaǵdaı 13 adamnyń ómirin qıdy. 

Lenın atyndaǵy shahtada gaz jaryldy (1998 jyl) 

1998 jyldyń qarashasynda sol shahtada gaz jarylyp, 3 adam qaza tapty. Oqıǵanyń basty sebebi – tehınkalyq aqaý dep ataldy.

«Shahtınskaıa» shahtasynda gaz jaryldy (2004)

2004 jyldyń jeltoqsanynda «Shahtınskaıa» shahtasynda lavada gaz jaryldy. Jarylys kezinde shahtada 89 adam bolǵan edi, onyń 23-i qaza tapty. Epıtsentr mańynda jumys istegender til tartpaı ketken. 

Lenın atyndaǵy shahtada metan jaryldy (2006 jyl)

Tótenshe jaǵdaılar ishinde eń kóp adam qaıtys bolǵan aýqymdy oqıǵa 2006 jyldyń 20 qyrkúıeginde boldy. Jarylys jeldetý qubyrlaryn aýystyrý kezinde qaýipsizdik tehnıkasynyń buzylýyna baılanysty shyqty. Tótenshe jaǵdaıdan 41 adam qaıtys bolyp, elde jalpyulttyq aza tutý jarııalandy. Oqıǵadan keıin alty jumysshy sottaldy. 

«Abaı» shahtasynda metan jaryldy (2008 jyl)

2008 jyldyń 11 qańtarynda Qaraǵandy oblysynyń Abaı qalasyndaǵy shahtada bolǵan qaıǵyly oqıǵadan 30 shahter qaza tapty. Tótenshe jaǵdaıdy tergeý barysynda ónerkásip qaýipsizdigin baqylaýǵa jaýapty eki sheneýnik qyzmetinen aıyryldy. 

«Saran» shahtasyndaǵy tótenshe jaǵdaı (2016 jyl)

2016 jyldyń 10 qarashasynda Qaraǵandy oblysynyń shahtalarynda iri apat boldy. «ArselorMıttalTemirtaý» kompanııasynyń «Saran» shahtasynda jumysshylar joǵaryǵa kóterilgen kezde arbanyń trosy úzildi. Saldarynan úsh adam oqıǵa ornynda qaıtys boldy, taǵy bireýi aýrýhanada kóz jumdy. 

«Abaısyzda eki nemese odan da kóp adamnyń ólimine ákep soqqan eńbekti qorǵaý qaǵıdalaryn buzý» baby boıynsha apatqa shahtanyń úsh jumysshysy – kabınany montajdaǵan jumysker, mashınıst jáne ýchaske bastyǵy kináli dep tanyldy. Úsheýi de bes jylǵa bas bostandyǵynan aıyryldy.

«Qazaqstan» shahtasyndaǵy apat (2017 jyl)

2017 jyldyń 31 tamyzynda saǵat 04:21-de Qaraǵandy oblysy Shahtınsk qalasynda «ArselorMıttal Temirtaý» AQ KD «Qazaqstan» shahtasynda jeldetý túıisiminde kenet kómir men gaz atqylaǵan. Sol ýaqytta shahta ishinde 136 adam bolǵan, onyń ishinde úsh adam avarııalyq qazbada bolǵan. Saǵat 05:35-te shahta qyzmetkeri zardap shekken úsh adamnyń máıitin tapty.

«Abaı» shahtasynda metan jaryldy (2021 jyl)

2021 jyldyń 7 qarashasynda saǵat 09:30-da Qaraǵandy oblysy Abaı qalasyndaǵy «Abaı» shahtasynyń kenjarynda metan jaryldy. Shahtada 64 qyzmetker bolǵan, 56 adam birden evakýatsııalandy. 3-K10 kenjarynda segiz jumysshy qalǵan, onyń ishinde alty adam qaıtys boldy, ekeýi gazdan ýlandy. Olar aýyr jaǵdaıda aýrýhanaǵa tústi.

«Saran» shahtasynda taý-ken massasy qulady (2022 jyl) 

Qaraǵandy oblysynda «Saran» shahtasynda taý-ken massasy qulap, 57 jastaǵy kenshi qaza tapty. Bul shahta da «ArselorMıttal Temirtaý» AQ kásipornyna tıesili. Qaıǵyly oqıǵa 2022 jylǵy 24 naýryzda bolǵan. 

Lenın shahtasynan órt shyqty (2022 jyl)

2022 jyly 3 qarashada Lenın atyndaǵy shahtasynda apat bolyp, saldarynan 5 kenshi qaza boldy. Sol ýaqytta Tótenshe jaǵdaı mınıstrligi 25 jyl boıy «ArselorMıttal Temirtaý» AQ shahta qabattarynda ýly zattardy zalalsyzdandyrý jumystaryn júrgizbegenin aıtty.

Qazaqstan shahtasynan órt shyqty (2023 jyl)

2023 jylǵy 17 tamyzda «Qazaqstan» shahtasynan órt shyqty. Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti. Shahtanyń astynda qalyp qoıǵan bes kenshiniń denesi tabyldy. 

18 qyrkúıekte QR TJ mınıstri Syrym Sháriphanov úkimettik komıssııanyń tergeý qorytyndysyn jarııalady. Saraptama qorytyndysy boıynsha jumys berýshi 100% kináli dep tanyldy. 

Kostenko shahtasynda órt boldy (2023 jyl)

2023 jyldyń 28 qazanynda «ArselorMıttal Temirtaý» kompanııasynyń Kómir departamentine qarasty Kostenko atyndaǵy shahtada órt boldy. Dál sol kezde kenishte 252 adam ken qazyp jatqan. Olardyń 205-i jer betine shyǵarylyp, 18-i medıtsınalyq kómekke júgindi. 21 shahterdiń múrdesi tabylsa, 26 kenshini izdeý jumysy jalǵasyp jatyr. 

Memleket basshysy Úkimetke «ArselorMıttalTemirtaý» kompanııasymen ınvestıtsııalyq yntymaqtastyqty toqtatýdy tapsyrdy. 

Óz kezeginde Úkimet «ArselorMıttal Temirtaý» AQ aktsıonerlerimen kásiporynnyń menshik quqyǵyn memleket paıdasyna berý týraly kelisimshart rásimdep jatyr.