«ArselorMıttal Temirtaýǵa» 16,5 mln teńge aıyppul saldy

ASTANA. QazAqparat – «ArselorMıttal Temirtaýǵa» 16,5 mln teńgeden asatyn aıyppul salyndy. Bul týraly QazAqparat Saýda jáne ıntegratsııa mınıstırligi Tehnıkalyq retteý jáne metrologııa komıtetine silteme jasap habarlaıdy.

Komıtettiń baspasóz qyzmeti taratqan aqparatqa súıensek, Qaraǵandy aýmaqtyq departamentiniń barlyq qyzmetkerleri jeti shahta men «Vostochnyı» ortalyq baıytý fabrıkasynyń qyzmetin tekserýge jumyldyrylǵan. Tekserýdi oblys prokýratýrasy taǵaıyndady. Onyń barysynda barlyq segiz obektide tekserý merzimi ótken 89 ólshem quralyn qoldaný faktisi anyqtalypty.

«Osyndaı ólsheý quraldarynyń durys emes nátıje kórsetýinen jeke jáne zańdy tulǵalardyń múddesin qorǵaý qamtamasyz etilmegen jáne bul jerasty tásilimen tas kómirin óndirýdi júzege asyratyn qyzmetkerlerdiń ómiri men densaýlyǵynyń qaýipsizdigine tikeleı áser etedi», - deıdi komıtet Tóraǵasy Qýanysh Elikbaev.

Osylaısha Qaraǵandy oblysy prokýratýrasynyń usynysy men materıaldarynyń negizinde «ArselorMıttal Temirtaý» Qazaqstan Respýblıkasy «Ákimshilik quqyq buzýshylyq týraly» Kodeksiniń 419-baby 1-bóliginiń 2-tarmaǵy boıynsha ákimshilik jaýapkershilikke tartylyp otyr.

«Budan basqa, Qaraǵandy Departamenti kásiporynǵa qatysty zańnamany buzýǵa yqpal etetin sebepter men jaǵdaılardy joıý týraly Jeke usynys engizdi, olar búgingi kúni joıyldy.

Sondaı-aq tekserispen «ArselorMıttal Temirtaýda» tas kómirdi jerasty tásilimen óndirý kezinde memlekettik retteýge jatpaıtyn ólsheýler júrgiziletini anyqtaldy, óıtkeni ólsheýlerdiń salalyq tizbelerine engizilmegen. Bul Ólshemder Qaýipsizdik pen eńbek jaǵdaılarynyń qaýipsizdigine tikeleı áser etedi. Jumystardyń qaýipsizdigin qamtamasyz etý úshin Departament ólshemder tizbesin odan ári qaraý jáne olardy salalyq memlekettik organdar bekitý úshin keńeıtý jóninde usynystar daıyndady», -dep jazylǵan komıtet málimetinde.