«ArselorMıttal Temirtaýdyń» baspasóz hatshysy jańa basshylyqtyń qysym kórsetip jatqanyn aıtty

ASTANA. QazAqparat – «ArselorMıttal Temirtaý» AQ Kómir departamenti baspasóz qyzmetiniń jetekshisi Janna Turabaeva ózine qatysty jańa basshylyq tarapynan qysym kórsetilip, jumystan shyǵarýǵa ıtermeleý áreketteri júrip jatqanyn málim etti.

Janna Turabaeva óziniń Facebook áleýmettik jelisindegi paraqshasynda jumys protsesinde betpe-bet kelip jatqan qıyndyqtardy tizip jazǵan. Onyń málimetine saı, Janna Turabaeva is-sharalardy uıymdastyrý boıynsha qyzmet kórsetýshimen yntymaqtastyq ornatýdan bas tartqan. Artynsha oǵan basshylyq tarapynan qysym kóresitilgen.

«Basshylyq meniń bólimimniń qarjylyq aýdıtine tekserý júrgizý bastamasyn kóterdi. Jaqsy, biraq meniń mynadaı usynysym bar – tekserý júrgiziletin bolsa, onda ol bas PR bólimge de júrgizilsin. Atap aıtqanda, Temirtaýdaǵy qysqy festıvaldi 3 ese arzan ótkizýge bolady. Osy qyzmetti kórsetýshi kim deısiz be? Sondaı-aq, Temirtaýdaǵy kombınat ǵımaratynyń mańyna ornatylǵan shyrsha bar. Onyń quny da naryqtyq baǵadan 3 ese joǵary. Jarııa etpeý jáne kommertsııalyq qupııa týraly kelisimshartqa sáıkes, somany aıta almaımyn. Maǵan senseńiz, qazir aqysyz demalysqa jiberilgen kóptegen qarapaıym eńbek adamdary qansha qarajattyń bosqa jumsalǵanyn bilse, renjýi múmkin», - dep jazdy Janna Turabaeva.

Ol QazAqparat tilshisiniń saýalyna jaýap bere otyryp, búginde eńbek ınspektsııasy men Qaraǵandy oblystyq prokýratýrasyna aryz jazǵanyn aıtty. Qazir tekseris júrip jatyr.

QazAqparat redaktsııasy «ArselorMıttal Temirtaý» AQ-na resmı saýal joldady.