ArselorMıttal Temirtaýdy tekserip jatqan halyqaralyq aýdıt jaqynda jumysyn aıaqtaıdy
Bul týraly Eńbek jáne áleýmettik qorǵaý komıtetiniń tóraǵasy – QR Bas memlekettik eńbek ınspektory Tólegen Ospanqulov «Samuryq-Qazyna» AQ qoǵamdyń keńesiniń otyrysynan keıin BAQ ókilderiniń saýalyna bergen jaýabynda aıtty.
«ArselorMıttalda» sońǵy qaıǵyly jaǵdaıdan keıin tergeý júrgizilgenin bilesizder. Oqıǵa 100 paıyz óndirispen baılanysty bolǵan. Kináliler anyqtaldy. Biraq tapsyrma boıynsha qazir ol jerde halyqaralyq aýdıt jumys istep jatyr. Áýeli biz Bas prokýratýranyń tapsyrmasy boıynsha eńbek ınspektorlarymen birge, basqa da baqylaýshy organdarmen birge atalǵan kásiporynǵa kirip, tekserý júrgizdik. Qazir ol tekserý toqtatyldy. Óıtkeni halyqaralyq aýdıt jumysyn bastap ketti», - dedi ol.
Aıtýynsha, bul halyqaralyq aýdıt shamamen mamyr aıyna qaraı jumysyn qorytyndylaýy kerek.
«Halyqaralyq aýdıt tek qana eńbek qaýipsizdigi boıynsha emes, ekologııa, ónerkásip qaýipsizdigi, tótenshe jaǵdaılar salasy sııaqty búkil sektor boıynsha jalpy aýdıt júrgizedi. Tirkelgen qaıǵyly jaıttardyń sebebine qarasaq, qondyrǵylar eskirgeni jáne jańartylmaǵany aıtylǵan. Odan basqa da qyrýar uıymdastyrý jumystary bar. Sondyqtan az ǵana kútý kerek. Halyqaralyq aýdıt aqyrǵy sheshimin shyǵarady», - dedi ol.