«ArselorMıttal Temirtaýdaǵy» adam ólimin tsıfrlandyrý arqyly azaıtýǵa bolady - mınıstr

QARAǴANDY. QazAqparat - Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın «ArselorMıttal Temirtaý» kompanııasyndaǵy apattardy azaıtý joldaryn aqparattyq tehnologııadan izdeý kerektigin aıtady, dep habarlaıdy QazAqparat.

«Búgin Premer-Mınıstrmen birge Qaraǵandy oblysynda is-saparmen boldym. IT-naryǵyn damytý, baılanys sapasyn jaqsartý, ónerkásip sektorynda tsıfrlyq transformatsııalaýdy qoldaný protsesteri týraly aqparatpen bólistim. Atap aıtqanda, «ArselorMıttaldaǵy» óndiristik nysandardy aralaı otyryp, Álıhan Ashanulyna óndiristik protsesterdi tsıfrlandyrýǵa jáne kásiporyndarda qaýipsizdikti qamtamasyz etýge yqpal ete alatyn 5G tehnologııasynyń múmkindikteri týraly baıandadym» dep jazdy mınıstr Facebook paraqshasynda.

Onyń aıtýynsha, Úkimet basshysy «ArselorMıttal» kásipornyna 5G jelileri negizinde úzdik tájirıbelerdi qoldana otyryp, jedel túrde tsıfrlandyrý jumystaryn júrgizýge naqty tapsyrma bergen.

«Mysaly, «aqyldy kaskalar» júıesin engizý arqyly shahtalardaǵy jumysshylardyń ornalasqan jerin anyqtaýǵa bolady, bul júıe olardyń dıspetcherlermen turaqty baılanysyn qamtamasyz etedi jáne shahtalarda bolyp jatqan oqıǵalar týraly onlaın rejımde úzdiksiz aqparat bere alady. Bul jumyskerlerdiń ómirin saqtap qalýǵa jáne jaraqattanýyn azaıtýǵa baǵyttalǵan bir ǵana mysal. Tsıfrlandyrýdyń arqasynda kóptegen mańyzdy protsesterdi ózgertýge jáne óndiristegi adamdardyń ómirin qorǵaýǵa bolady» dep atap ótti Baǵdat Mýsın.

Aıta keteıik, sońǵy 15 jylda «ArselorMıttal Temirtaý» zaýyttarynda 100-den astam jumysshy qaza tapqan.

Foto: facebook.com/BagdatMussin