«ArselorMıttal Temirtaý» qaza tapqan qyzmetkerlerdiń otbasyna kómek kórsetedi

QARAǴANDY. QazAqparat – «ArselorMıttal Temirtaý» AQ basshylyǵy qaza tapqan qyzmetkerlerdiń otbasylaryna kómek kórsetiletinin málimdedi, dep habarlaıdy QazAqparat tilshisi.

«Búgin, 10 maýsym «Qurylysmet» JShS masterpress tsehynda jazataıym oqıǵa bolyp, saldarynan «ArselorMıttal Temirtaý» AQ tórt qyzmetkeri qaza tapty. Besinshi qyzmetker Temirtaý qalasynyń ortalyq qalalyq aýrýhanasyna jatqyzyldy, jaǵdaıy birqalypty. Arnaıy komıssııa quryldy, is tergelip jatyr. Ujymdyq sharttyń talaptaryna sáıkes marqumdardyń otbasylaryna búkil qajetti kómek kórsetiledi» delingen kompanııanyń resmı saıtynda.

Esterińizge sala keteıik, búgin «Qurylysmet»« JShS aýmaǵynda «ArselorMıttal Temirtaý» AQ qyzmetkerleri qaıǵyly jaǵdaıǵa ushyraǵan bolatyn.

Otqa tózimdi qurylysty bólshekteý kezinde tsehtyń jumys istemeıtin №9 termııalyq peshiniń tóbesi qulady. Úıindi astynda bes adam qalyp qoıdy.

Onyń tórteýi qaıtys boldy, 1994 jyly týǵan taǵy bir jumysker aýrýhanaǵa jetkizildi.

Atalǵan fakti boıynsha Qylmystyq kodekstiń 277-baby 3-bóligi boıynsha qylmystyq is qozǵaldy.