ArselorMıttal Temirtaý kásipornynda taǵy bir jumysshy bıikten qulap kóz jumdy

TEMІRTAÝ. QazAqparat - Temirtaýdaǵy «ArselorMıttal Temirtaý» kompanııasyna tıesili jylý elektr ortalyǵynda montajdaýshy qaza tapty, dep habarlaıdy QazAqparat tilshisi.

«Búgin, 16 maýsym kúni JEO-2 №7 qazandyǵynda montajdaý jumystaryn júrgizý kezinde kútpegen jaǵdaı boldy. 1986 jyly týǵan «AB Construction» JShS qyzmetkeri bıikten qulap, jaraqat saldarynan kóz jumdy», - dep habarlady Qaraǵandy oblysy ákiminiń baspasóz qyzmeti.

Qazirgi ýaqytta is tergelip jatyr.

«AB Construction» kompanııasynyń basshylyǵy marqumnyń týystary men jaqyndaryna qaıǵyryp kóńil aıtady.

JEO-2 - «ArselorMıttal Temirtaý» kompanııasynyń iri óndirýshi kásiporny sanalady.

Stantsııa óndirgen elektr energııasy kompanııa kásiporyndarynyń elektr júktemelerin jabýǵa jumsalady.

Artyq elektr energııasy Qazaqstan Respýblıkasynyń elektr energııasy naryǵynda satylady.

Temirtaý energııa torabyndaǵy úsh elektr stantsııasynyń biri.

Esterińizge sala keteıik, 10 maýsymda «ArselorMıttal Temirtaý» AQ enshiles kásipornynda shatyr opyrylyp qulaǵan bolatyn.

Oqıǵa saldarynan tórt jumysshy qaza taýyp, bireýi aýrýhanaǵa jetkizildi.