«Arselor Mıttall», «Qazaqmys», «QTJ» jáne «Eır Astana» jumysshylaryn qysqartpaıtyn boldy

NUR-SULTAN. QazAqparat - QR Indýstrııa jáne ınfraqurylymdyq damý mınıstrligi jumysshylardy qysqartpaý týraly iri kompanııalarmen kelissóz júrgizdi, dep habarlaıdy QazAqparat.

Bul týraly mınıstrdiń mindetin atqarýshy Qaıyrbek Óskenbaev aıtyp berdi.

«Halyqty jumyspen qamtýda bizdiń sala boıynsha óńirge qaraıtyn 700 myńdaı adam jumys isteıdi. Úkimet tapsyrmasymen «Arselor Mıtall», «Qaztsınk», «Qazaqmys» syndy iri kompanııalarmen kelisimshartqa otyrdyq, jumyskerler sanyn qysqartýǵa tyıym salynǵan. Múmkin jarty kúnge jiberetin shyǵar, biraq eshkimdi tolyq qysqartpaıdy», - dedi Q. Óskenbaev ortalyq kommýnıkatsııalar qyzmetinde ótken brıfıngte.

Onyń aıtýynsha, jol salasynda 200 myńǵa jýyq adam jumys isteıdi. Berilgen tapsyrma boıynsha, olar 100 paıyz qazaqstandyq ónimdi paıdalanýy tıis jáne eshkim jumystan qysqarmaýy kerek.

«Ásirese daǵdarys kólik salasyna eń kóp yqpal etti. Áýe, temirjol, avtokólik barlyǵynyń qozǵalysy toqtap qaldy. Biraq biz «Qazaqstan temir joly», «Eır Astana», «Skat» syndy kompanııalarmen kelistik. Temirjol salasynda - 125 myń adam, avıatsııada - 20 myńnan astam adam jumys isteıdi. Munda da eshkim qysqartylmaıdy. Barlyǵy óz ornynda qalady», - dedi vedomstvo ókili.

Mınıstrlikke qaraıtyn taǵy úlken sala - qurylysta 600 myńnan astam adam jumys isteıdi.

«Qazir Úkimet qurylys máselesine kóp kóńil bólip otyr. Sebebi, qurylys - eń kóp jumysty qamtıtyn sala. Oǵan qosymsha qarajat bólip, qosymsha jumys oryndaryn ashý máselesin alǵa qoıyp otyrmyz», - dedi Qaıyrbek Óskenbaev.