«Arselor Mıttal Temirtaý» óndiristik jaraqat oqıǵalaryn turmystyq jaǵdaılarǵa aýystyryp jasyrýda - depýtat A. Bekenov

ASTANA. QazAqparat - «Arselor Mıttal Temirtaý» shahtalaryndaǵy óndiristik jaraqattar turmystyq oqıǵalarmen jasyrylyp jatyr. Bul týraly búgin QR Parlamenti Májilisi Áleýmettik-mádenı damý komıteti men «Nur Otan» partııasy Fraktsııasynyń janyndaǵy Óńirlik saıasat jáne máslıhattarmen jumys jónindegi keńesiniń keńeıtilgen birikken otyrysynda depýtat Ashat Bekenov málim etti.

«Júrgizgen taldaýǵa qaraǵanda, Densaýlyq saqtaý jáne áleýmettik damý mınıstrligi málimeti boıynsha 2014 jyly 2006 adam óndiristik jaraqat alyp, 334 adam qaza bolǵan. Bul kórsetkish 2013 jylmen salystyrǵanda 11 paıyzǵa artyq. Ulttyq ekonomıka mınıstrligi Statıstıka komıtetiniń deregi boıynsha atalǵan merzimde 2 136 adam óndiristik jaraqat alyp, onyń 263-i qaıtys bolǵan. Jaraqat alǵandar sany 130-ǵa artyq, al qaza tabý oqıǵasy 71 adamǵa kem», - dedi A. Bekenov.

Osy oraıda depýtat túrli vedomstvolardyń málimetteri sáıkespeıtindigin atap ótti. Sonymen qatar óńirler boıynsha da óndiristik jaraqat alý statıstıkasynyń derekteri sáıkes kelmeı otyrǵan kórinedi.

Onyń aıtýynsha, óndiriste jaraqat alý kórsetkishteriniń tómendeýine atalǵan faktilerdi jasyrý áser etýde. Máselen, «Arselor Mıttal» kompanııasynda kásiporyndarynda bolǵan jazataıym oqıǵalar turmystyq jaǵdaılar sanatyna aýystyrý arqyly jasyrylady.

2013 jyly «Arselor Mıttal Temirtaý» shahtalary óndirisinde 20 jazataıym oqıǵa oryn alsa, shahtalardyń densaýlyq pýnkterinde turmystyq jaraqattardyń 1 077 oqıǵasy tirkelgen eken. 2014 jyly óndiristik 19 jaraqat tirkelse, turmystyq 986 oqıǵa oryn aldy.