Áriptesteri Almatyda avtobýs apatynan kóz jumǵan erli-zaıypty muǵalimder týraly aıtty
M.Mámetova atyndaǵy orta mekteptiń dırektory Gúlnaz Begazovanyń aıtýynsha, Talap Baıdýáliuly 1978 jyly 12 tamyzda Qyzylorda oblysy Jańaqorǵan aýdany Talap aýylynda dúnıege kelgen. Bilimi joǵary. 1996-2000 jyldar aralyǵynda Ózbekstan Respýblıkasy Syrdarııa oblysy Gúlstan memlekettik ýnıversıtetinde qazaq tili men ádebıet pánin oqyǵan. Joǵarǵy oqý ornyn aıaqtaǵan soń, eńbek jolyn 2000 jyly Tashkent oblysynyń Shynaz aýdanyndaǵy №22 JOM bilim mekemesinde bastaǵan. 2009 jylǵa deıin Ózbekstanda bilim salasynda eńbek etken. 2020 jyldan beri M.Mámetova atyndaǵy orta mektepte dırektordyń sharýashylyq isi jónindegi orynbasary bolyp jumysqa qabyldandy.
Gúljahan Jetpisbaıqyzy 1978 jyly 18 sáýirde Ózbekstan Respýblıkasy Syrdarııa oblysynda dúnıege kelgen. 1994-1999 jyldary Ózbekstannyń Gúlistan memlekettik ýnıversıtetinde oqyǵan, qazaq tili men ádebıeti páni muǵalimi mamandyǵyn támamdaǵan. Eńbek jolyn 1999 jyly Tashkent oblysynyń №22 mektepte qazaq tili men ádebıeti páni muǵalimi bolyp bastaǵan. 2021 jyldan bastap M.Mámetova atyndaǵy orta mektepte qazaq tili men ádebıeti páninen qosalqy qyzmetker retinde muǵalimi bolyp jumys istedi.
«Bizben birge qyzmet atqarǵan qos áriptesimiz Talap Baıdýáliuly men Gúljahan Jetpisbaıqyzy ómirde de, qyzmette de jaýapkershiligi joǵary, adamgershiligi mol, jyly júzdi, jandary jaısań ekenderin kórsetti. Arttarynda 2 ul, 2 qyzdary qaldy. Olardyń eńbegi men jarqyn júzi máńgi esimizde qalady. Jandary jánnatta bolsyn dep tileımiz», - dedi M.Mámetova atyndaǵy orta mekteptiń dırektory Gúlnaz Begazova.
Mektep dırektorynyń tárbıe isi jónindegi orynbasary Maqsat Manapbaevtyń aıtýynsha, apat bolǵan kúni Talap Qosymov pen Gúljahan Yrysymbetova mektepten shyǵyp, aıaldamaǵa qalaısha tez jetkeni belgisiz bolyp otyr.
«Qaıǵyly jaǵdaı bolatyn kúni Talap aǵany birneshe ret kórdim. Kóńilinde eshqandaı alańdaýshylyq bolǵan joq. Ádettegideı jaqsy kóńil kúıde júrdi. 22 jeltoqsan kúni keshke jubaıy Gúljahan Jetpisbaevamen birge saǵat 18.00 shamasynda mektepten shyǵyp ketken. Al qaıǵyly jaǵdaı saǵat 18.15-te boldy. Biz bul jerde balalaryna asyqqan olardyń mektepten 10 shaqyrym jerdegi Qalqaman aıaldamasyna tez jetkenin baıqaımyz. Olar aıaldamaǵa taksımen nemese basqa kólikpen jetti ma, ol jaǵy belgisiz bolyp tur. Alaıda olardyń qol ustasyp aıaldamaǵa qaraı bet alyp bara jatqanyn kórgender bar», - dedi ol.
Maqsat Manapbaev Talap Qosymovpen týǵan aǵaly-inili kisilerdeı aralasqanyn aıtty.
«Bizdiń mekteptiń ákimshiliginde tek qyzdar eńbek etedi. Olardyń arasynda er-azamattardan Talap aǵa ekeýimiz ǵana boldyq. Sol sebepten bolar, ekeýimiz óte jaqsy aralasyp, ekeýimiz týǵan aǵaly-inili kisilerdeı bolyp kettik. Ekeýimiz jumysta da kóbine birge júretinbiz, túski asqa da birge baratynbyz. Qandaı da bir másele shyqsa bir-birimizge kómegimizdi aıamaıtynbyz. Gúljahan apaı óte qarapaıym, elge syıly jaqsy adam boldy. Bilimdi, saýatty ustaz boldy, ony oqýshylar da jaqsy kórdi. Ol ekeýi de óz salasynyń bilikti mamandary boldy», - dedi Maqsat Manapbaev.
Ol sondaı-aq Talap Qosymov pen Gúljahan Yrysymbetova Talap Qosymovtyń týǵan jeri Túrkistan oblysy Jetisaı aýdany Igilik aýylynda jerlengenin aıtty.
Qazaq tili men ádebıeti pániniń muǵalimi Qalbıke Dúısenǵalıeva avtobýs ishinde kólik júrgizýshi áıeldi urǵan er adam jaýapqa tartylýy kerek dep sanaıdy.
«Tipti jeńil avtokólikte kele jatsaq ta júrgizýshini alańdatpaýǵa tyrysamyz ǵoı. Al qoǵamdyq kólikte qanshama adam bolady. Olardyń ómirine júrgizýshi jaýapty emes pe? Áıel júrgizýshini urǵany durys bolǵan joq. Ne de bolsa sabyr saqtaýy kerek edi», - dedi Qalbıke Dúısenǵalıeva.
Ol Talap Qosymov pen Gúljahan Yrysymbetovanyń artynda tórt bala, atap aıtqanda, eki ul, eki qyz qalǵanyn aıtty.
«Olardyń otbasy Qaskeleń qalasynda turdy. Marqumdar osy aýylǵa baryp-kelip istep júrdi. Olardyń artynda eki ul, eki qyz qaldy. Úlken uly 23 jasta, áskerge baryp kelgen, ekinshi qyzdary 18-de, ınstıtýtta oqıdy, úshinshi qyzdary 14-te, mektepte 9 synyp oqıdy jáne bes jasar uldary qaldy. Talap aǵa dırektordyń orynbasary bolyp qana qoımaı, mektepte qazaq ádebıetinen de sabaq berdi. Jalpy, ekeýi de ulaǵatty ustaz, qarapaıym, meıirimdi, balaǵa bilgenin úıretkisi keletin asyl jandar edi. Olardyń jarqyn beınesi esimizde máńgi saqtalady», - dedi Qalbıke Dúısenǵalıeva.
Aldaǵy ýaqytta qos ustazdyń esimin qaldyrý maqsatynda mektepte túrli is-sharalar ótetin bolady. Bul týraly M.Mametova atyndaǵy orta mektep dırektorynyń oqý isi jónindegi orynbasary Kenjegúl Saǵymbekova aıtty.
«Ustazdardy umyttyrmaı, mekteptiń bir kabınetine olardyń esimin berip, estelik keshterdi ótkizip otyramyz degen josparymyz bar. Qaıǵyly oqıǵaǵa baılanysty mektebimizde bıyl Jańa jyl keshi ótpeıtin boldy. Bul rette balalar men olardyń ata-analaryna raqmet. Olar buǵan túsinistikpen qarady, eshkim qarsy bolǵan joq. Ata-analar da marqumdardyń otbasyna dep qomaqty qarjy jınap berdi», - dedi Kenjegúl Saǵymbekova.
Talap Qosymovtyń inileri balalarǵa qamqor bolatynyn aıtty.
«Búgin Qaskeleńde meshitinde marqumdardyń rýhyna arnalyp, as berildi. Onda biz de mektep ujymy bolyp baryp, týystarymen kórisip keldik. Artynda tórt balapany qaldy. Bárimiz olarǵa qamqor bolýǵa tyrysamyz. Týystaryna qandaı kómek qajet bolsa, daıyn ekenimizdi aıtyp kettik. Jalpy, Talap aǵaıdyń eki inisi balalarǵa qamqor bolamyz dep otyr», - dedi Kenjegúl Saǵymbekova.
Eki ustazdyń shákirtteri, 6-synyptyń oqýshylary da ustazdary jaıly esteligin bólisti.
«Balalary erte jasta ata-anasyz qalǵany aıanyshty boldy. Sebebi ata-ana olardyń ómirdegi úlken tiregi edi. Gúljahan apaı óte meıirimdi, túsinistikpen qaraıtyn, bizge kómek kórsetetin. Al Talap aǵaı bizdi únemi qoldap júretin, olar bizdiń úlken tiregimiz boldy deýge bolady», - dedi Mılena Agalıeva.
«Gúljahan apaı sabaqty óte jaqsy túsindiretin. Eger bireý túsinbeı qalsa, erinbeı qaıta túsindirip beretin. Ol solaı bárimizge múmkindik beretin», - dedi Ilıf Jafarova.
«Gúljahan apaı bizge únemi kómektesetin. Bizdi qoldaıtyn. Ol óte jaqsy adam boldy. Mundaı adam ómirden ótti deýge sený qıyn», - dedi Enel Chalabova.
«Bulaı bolǵany ókinishti. Gúljahan apaı jaqsy muǵalim edi. Talap aǵaı óte meıirimdi boldy. Ártúrdi jaǵdaıda bizdi qoldap otyratyn. Biz olardyń esimin eshqashan umytpaımyz. Olar ımandy bolsyn», - dedi Safııa Alıeva.
Aıta keteıik, qaza bolǵan juptyń mekteptegi ujymdastary qaıǵyly jaǵdaıdy polıtsııa qyzmetkerleri nege ýaqytyly habar bermegenin túsinbeı dal bolýda.
Eske salaıyq, Almatyda avtobýs bir top adamdy qaqqan edi. Polıtsııanyń málimetinshe, №47-shi baǵyttaǵy qoǵamdyq kóliktiń ishindegi jolaýshy janjal shyǵaryp, júrgizýshi áıeldi urǵan. Saldarynan ol esinen tanyp, kólikti basqara almaı qalǵan.
Apat saldarynan 7 adam zardap shekti. Jedel medıtsınalyq qyzmet kelgenshe úsh adam qaıtys bolǵan.
Sondaı-aq, Almatyda avtobýs júrgizýshisin urǵan jolaýshyǵa qatysty qylmystyq is qozǵaldy.
Keıin ol kúdikti eki aıǵa qamaýǵa alynǵanyn habarlaǵanbyz.