Arnaıy jumys toby Almatydaǵy Qazposhta qyzmetkerleriniń talaptaryn qarap jatyr

ASTANA. QazAqparat - Almatydaǵy «Qazposhta» fılıaly qyzmetkerleriniń tómen jalaqyǵa qatysty bildirgen narazylyǵynan soń, arnaıy jumys toby quryldy. Bul týraly elordada ótken brıfıngide «Qazposhta» AQ basqarma tóraǵasy Serik Saýdabaev málim etti, dep habarlaıdy QazAqparat tilshisi.

«16 qyrkúıekte Almatydaǵy «Qazposhta» fılıaly ǵımaratynyń aldyna qyzmetkerler jınalyp, tómen jalaqy men kásibı jáne memlekettik merekege syıaqynyń berilmeıtinin aıtyp, narazylyq bildirgen edi. Osyǵan baılanysty Almatyǵa «Qazposhtanyń» basqarýshy dırektory Erjan Baıtana jáne men de bardym. Kezdesý barysynda árbir qyzmetker óz talabyn aıtty. Olar kótergen máseleler bizge burynnan belgili. Kezdesý qorytyndysy boıynsha atalǵan problemany sheshýge baǵyttalǵan jumys tobyn qurdyq. Ol qyzmetkerlerdiń barlyq talaptaryn qaraıdy», - dedi «Qazposhta» AQ basqarma tóraǵasy Serik Saýdabaev.

Jumys tobynyń quramyna «Qazposhtanyń» eki basqarýshy dırektory, kásipodaq tóraǵasy, sondaı-aq talap qoıǵan qyzmetkerler tobynan eki ókil kiredi.

«Atalǵan komıssııa búgin saǵat tańǵy 09:00-de jumysqa kiristi. Eki aptadan keıin jumys toby qorytyndy shyǵarydy. Sol ýaqytta fılıal qyzmetkerlerimen kezdesýdi josparlap otyrmyn», - dep atap ótti Serik Saýdabaev.

Eske salaıyq, 16 qyrkúıekte Almatyda «Qazposhta» AQ fılıaly ǵımaratynyń aldyna bir top qyzmetker jınalyp, jalaqyny kóterýdi talap etken bolatyn . Onda keıbir qyzmetker tipti 40 myń teńge jalaqy alatyndaryn da aıtqan edi. Degenmen atalǵan kompanııa bul aparattty joqqa shyǵardy.