Arnaıy salyq rejimi: Biryńǵaı jıyntyq tóleminiń mólsheri qandaı bolady

ASTANA. QazAqparat - QR Ulttyq ekonomıka mınıstri Tımýr Súleımenov ózin-ózi jumyspen qamtyp júrgen azamattardyń salyǵy qalaı jáne qandaı kólemde tólenetinin túsindirdi, dep xabarlaıdy QazAqparat tilshisi.

«Biryńǵaı jıyntyq tóleminiń mólsheri qala turǵyndary úshin aıyna bir aılyq eseptik kórsetkishti, al aýyl turǵyndary úshin 0,3 aılyq eseptik kórsetkishti quraıdy. Tólem quramyna barlyq áleýmettik tólemder kiredi. Sonyń ishinde jeke tabys salyǵy - 10 %, mindetti zeınetaqy jarnasy - 40 %, memlekettik áleýmettik saqtandyrý qoryna - 10 %, medıtsınalyq saqtandyrý jarnasy - 40 %. Shekti tabys mólsheri jylyna 100 eselengen jalaqynyń eń tómengi mólsheri, ıaǵnı aıyna - 235 teńge», - dedi T.Súleımenov Úkimettiń búgingi otyrysynda.

Mınıstrdiń aıtýynsha, biryńǵaı jıyntyq tólemin aýdaratyndardy esep berýge mindettemeıdi. Tekserister bolmaıdy, ákimshilik jaza da qoldanylmaıdy. «Biryńǵaı jıyntyq tólemi bankter men termınaldar arqyly «Azamattarǵa arnalǵan úkimet» memlekettik korporatsııasynyń esepshotyna aýdarylady. Memlekettik korporatsııa odan ary tıisti qorlarǵa ózi bóledi. Biryńǵaı jıyntyq tólemi jeke tulǵanyń tirkeý orny boıynsha tólenedi. Salyq kezeńi - bir aı», - dep atap kórsetti T.Súleımenov.  

Aıta keteıik, búgingi otyrysta QR Eńbek jáne xalyqty áleýmettik qorǵaý mınıstri Mádına Ábilqasymova arnaıy salyq rejımi - biryńǵaı jıyntyq tóleminiń engiziletinin málimdedi. Onyń aıtýynsha, atalǵan júıeniń negizgi maqsaty - ózin-ózi jumyspen qamtyp júrgen azamattardy tirkeý sharalaryn jeńildetip, beıresmı jumyspen qamtylǵan xalyqtyń qyzmetin zańdastyrý.