Arnaıy oryndar beıbit jıyn ótkizý mádenıetin arttyrady - Danııar Esın
«Zańnamamen beıbit jıyn ótkizý úshin eskertý tártibin engizý josparlanyp otyr», - dedi ol «Qazaqstan Respýblıkasynda beıbit jıyndar, sherý, pıketter, demonstratsııalyq jınalystardy ótkizý men uıymdastyrý tártibi týraly» zań jobasyn qoǵamdyq tyńdaý barysynda.
Onyń atap ótýinshe, beıbit jıyn ótkizýge jergilikti atqarýshy organdar tarapynan jaýap bolmaǵan jaǵdaıda ol kelisilgen dep sanalady.
«Sonymen qatar zań jobasynda beıbit jıyn ótkizý úshin balama oryn usyný quqyǵy kózdeledi. Jıyn ótkizýge ruqsat berýden bas tartýdyń birqatar sebebi orynnyń bos bolmaýyna baılanysty ekenin tájirıbe kórsetip otyr. Biz zańnamalyq turǵyda balama orynnyń bolýyn qarastyramyz. Beıbit jıyndar shetki aımaqtan emes, mamandandyrylǵan oryndarda, sonymen qatar máslıhat quziretimen bekitilgen oryndarda ótkiziledi. Oryndy usyný barysynda onyń qalanyń shetki aımaǵynda bolmaýy prıntsıpi saqtalýy tıis», - dedi Danııar Esın.
Vıtse-mınıstrdiń aıtýynsha, mundaı oryndardy aıqyndaý barysynda ınfraqurylym da qaperge alynýy tıis.
«Bul oryndardy aıqyndaý jáne olardy paıdalaný tártibin bekitý barysynda beıbit jıyn maqsatyna qol jetkizý múmkinshiligi, uıymdastyrý qolaılyǵy, kólik qoljetimdiligi, uıymdastyrýshylar men qatysýshylardyń ınfraqurylymdy paıdalana alýy, sanıtarlyq normalar men qaýipsizdik erejeleriniń saqtalýy qamtamasyz etilýi tıis. Zańnamamen mundaı mamandandyrylǵan oryndar eldi mekenniń ortalyq bóliginde anyqtalatyny kózdelgen. Biz mamandandyrylǵan oryndardy engizý beıbit jıyndar ótkizý mádenıetin arttyrýǵa, septigin tıgizip, oı-pikirdi erkin aıtý úshin mamandandyrylǵan oryndardyń qoljetimdiligin qamtamasyz etedi dep sanaımyz. Óıtkeni, mundaı oryndar beıbit jıyn ótkizýge, uıymdastyrýshylar men qatysýshylardyń qaýipsizdigin qamtamasyz etýge arnalady», - dedi vıtse-mınıstr.
Aıta keteıik, zań jobasyn qoǵamdyq talqylaýǵa memlekettik organdar, úkimettik emes uıymdardyń ókilderi, kórnekti qoǵam qaıratkerleri men zańger ǵalymdar qatysty.