Arnaıy operatsııa: Astanada er adamnan 200 gramm gashısh tabyldy

NUR-SULTAN. QazAqparat – «Qarasora-2021» operatsııasynyń aıasynda astananyń 26 jastaǵy turǵyny 200 gramm gashıshpen ustaldy. Ol esirtki stýmen aınalysty degen kúdikke ilinip otyr, dep habarlaıdy QazAqparat.

Nur-Sultan qalalyq Polıtsııa departamenti baspasóz qyzmetiniń habarlaýynsha, saqshylar «Qarasora-2021» respýblıkalyq operatsııasy sheńberinde esirtki saýdasynyń arnasyn áshkereledi.

«28 maýsymda Imanbaev kóshesinde esirtki satqany úshin elordanyń 26 jastaǵy turǵyny ustaldy. Odan jalpy salmaǵy 200 gramm gashısh tárkilendi.

Budan bólek, 29 maýsym kúni shuǵyl-izdestirý sharalary barysynda esirtki tasymalyn uıymdastyrýshy 37 jastaǵy er adam ustaldy. Onyń kóligin tintý kezinde 9 keli marıhýana tárkilendi», - deıdi Polıtsııa departamenti esirtki qylmysyna qarsy is-qımyl basqarmasynyń bastyǵy Oljas Jarylǵapov.

Polıtsııa qyzmetkerleriniń aıtýynsha, tárkilengen esirtkiniń baǵasy «qara naryqta» 9 mıllıon teńgege jýyq.

«Ustalǵandar ýaqytsha ustaý ızolıatoryna qamaldy. Tergeý júrip jatyr, elordaǵa esirtki jetkizýge qatysy bar qylmystyq tizbektiń barlyq qatysýshylary anyqtalýda», - dep jazylǵan departamenttiń dereginde.