Arnaıy qosymsha «qaýipti» júrgizýshiniń kele jatqanyn avtomatty túrde habarlaıdy - ІІM

ASTANA. QazAqparat – QR Іshki ister mınıstri Marat Ahmetjanov jol erejesin buzǵandardy anyqtaıtyn «Qorǵaý» qosymshasynyń bastapqy kórsetkishterin jarııalady, dep habarlaıdy QazAqparat tilshisi.

«Qazirgi ýaqytta erekshe qaýip tóndiretinder – erejeni óreskel buzýshylar. 71 myń osyndaı júrgizýshi jol erejesin 6-dan 150 retke deıin buzǵan. Qazir bizdiń bastamamyzben, 6 qalada (Astana, Almaty, Shymkent, Óskemen, Atyraý jáne Túrkistan) «Qorǵaý» qosymshasy iske qosyldy. Bul jalǵan nómirleri bar, saqtandyrý polısi joq, izdeýde júrgen nemese jol erejesin júıeli túrde buzatyn jáne aıyppul tólemeı júrgen júrgizýshilerdi anyqtaıdy», - dedi Marat Ahmetjanov Úkimettiń otyrysynda.

Buǵan deıin, mundaı faktiler kólikterdi toqtatyp, olardyń qujattaryn jeke tekserýde ǵana anyqtalatyn. Al qazir, «Qorǵaý» qosymshasy kóshedegi kameralardyń derekterin taldap, polıtseıdiń planshetine «qaýipti» júrgizýshi kele jatqanyn avtomatty túrde habarlaıdy. Tez arada óreskel buzýshynyń joly kesiledi.

«Qosymsha arqyly jalǵan nómirmen júrgen 604 fakti anyqtaldy. 1 609 júrgizýshi kýáliginen aıyryldy. 2 400 memlekettik nómir tárkilendi. Aıyppul turaǵyna 8 myń avtokólik qamaldy. Óńirlerdiń ákimderine barlyq iri eldi mekenderde osy júıeni engizý jumysyn qolǵa alý kerek. Bul – joldaǵy mádenıetti arttyrýǵa jáne jazanyń bultartpastyq prıntsıpin qamtamasyz etýge múmkindik beredi», - dedi Marat Ahmetjanov.