Arnaıy komıssııa Almatydaǵy balabaqshalardyń jumysyn tekseredi - mınıstrlik

ALMATY. QazAqparat - Arnaıy komıssııa Almaty qalasyndaǵy balabaqshalardyń jumysyn tekseredi. Komıssııa quramyna bilim berý salasyndaǵy sapany qamtamasyz etý departamentiniń ókilderi, sarapshylar, ádiskerler men qoǵam belsendileri kiredi. Bul jumys elimizdiń basqa óńirlerinde de júrgiziledi, dep habarlaıdy QazAqparat Bilim jáne ǵylym mınıstrligine silteme jasap.

Vedomstvonyń málimetinshe, komıssııa músheleri mektepke deıingi uıymdardaǵy jaǵdaı men balabaqsha qyzmetkerleri jumysynyń sapa standarttaryna sáıkestigin tekseredi.

«Balabaqshalar 100% qaýipsiz bolý kerek. Osy kúnderi Almatydaǵy eki mektepke deıingi uıymda oryn alǵan oqıǵalarǵa jol berýge bolmaıdy. Balabaqshalar ákimdikterdiń qaramaǵynda. Sonymen qatar zań buzýshylyqtardyń basym kópshiligi jekemenshik balabaqshalarda tirkeledi. Biraq qaýipsizdikti menshik nysany men baǵynystylyǵyna qaramastan qamtamasyz etý qajet. Ókinishke oraı, osy jyldyń qyrkúıegine deıin mektepke deıingi uıymdardyń sapasyn memlekettik baqylaý tetikteri múldem bolǵan emes», – dep atap ótti Bilim jáne ǵylym salasynda sapany qamtamsyz etý komıtetiniń tóraıymy Gúlzat Kóbenova.

Onyń aıtýynsha, balabaqshalar basqa bilim berý uıymdaryna qaraǵanda, lıtsenzııalaýdan bosatylyp, habarlama arqyly ashylǵan. Sonymen qatar buryn memlekettik baqylaý men attestattaýdan bosatyldy.

«Tek bıyl ǵana biz balabaqshalarǵa memlekettik tekserý ınstıtýtyn zańdy túrde engize aldyq. Osyǵan baılanysty kóptegen narazylyq boldy. Biraq balalardyń máselesine kelgende, beı-jaı qaramaý kerek. Alǵashqy nátıjeler mundaı tekserýdiń qajettiligin kórsetti. Jeltoqsan aıynyń basynda biz teksergen balabaqshalardyń shamamen 80%-y bilim berý qyzmetine qoıylatyn talaptarǵa sáıkes kelmeýine baılanysty memlekettik attestattaýdan ótpegenin habarladyq. Sondyqtan biz baqylaý quralyn engizdik», - dedi ótti Bilim jáne ǵylym salasynda sapany qamtamsyz etý komıtetiniń tóraıymy.

Gúlzat Kóbenovanyń aıtýynsha, memlekettik tapsyrysty jeke menshik balabaqshalarda ornalastyrýǵa, tárbıeshilerdiń biliktiligine jáne qaýipsizdik máselelerine qoıylatyn talaptar kúsheıtilmek.

«Sonymen qatar mektepter men balabaqshalarda pedagogıkalyq jumysqa alǵash kiretinderdiń biliktiligin táýelsiz tekserý týraly talap engiziledi.

Balabaqshalar zańdy ákimdikterdiń qaraýynda ekenin eskere otyryp, biz mektepke deıingi uıymdardyń jumysyn erekshe baqylaýǵa alý qajettigin birneshe ret atap óttik. Ár topqa beınekameralar berilýi kerek. Balalarmen jumys isteıtin kadrlardy irikteý máselesi de óte mańyzdy», - dedi ol.