Arnaıy ekonomıkalyq aımaqtardyń jumysyna taldaý júrgizildi

NUR-SULTAN. QazAqparat - Indýstrııalyq damý komıteti arnaıy ekonomıkalyq aımaqtardyń jumysyna taldaý júrgizip, olardyń tıimdiligin arttyrý boıynsha sharalar keshenin ázirledi, dep habarlaıdy QR IIDM baspasóz qyzmeti.

Búgingi tańda Qazaqstanda 13 arnaıy ekonomıkalyq aımaq jumys isteıdi. El óńirlerinde túrli salalar boıynsha klasterler qurylǵan. Jalpy, óńdeý ónerkásibinde 1,9 trln teńge somasyna 297 joba iske asyryldy, sondaı-aq 209 joba iske asyrylý satysynda. IT, logıstıka, saýda, densaýlyq saqtaý, ǵylym jáne týrızm sııaqty salalarda 131 joba júzege asyrylǵan.

Endigi kezekte sala mamandary aralas rejımde jumys isteıtin aýmaqtardy engizýdi usynyp otyr. ıAǵnı, joba arnaıy ekonomıkalyq aımaq qyzmetiniń basym túrlerine sáıkes kelmeıtinine qaramastan, ınvestor AEA aýmaǵynda ornalasyp, olar úshin ınfraqurylym qoljetimdi bolady. Alaıda, bul jaǵdaıda salyqtan bosatý sııaqty jeńildikter berilmeıdi. Jeńildikti rejım jobanyń áleýmettik-ekonomıkalyq nátıjesine jáne tehnologııalyq kúrdeliligine baılanysty saralanǵan túrde áreket etetin bolady.

Budan basqa, AEA basqarýshy kompanııalarynyń kadrlyq quramyna erekshe nazar aýdarylatyn bolady. Dırektorlar keńesiniń quramyna ınvestıtsııalyq jobalardy iske asyrý boıynsha tájirıbesi bar táýelsiz dırektorlardy engizý máselesi qarastyrylýda. Sonymen birge qyzmetkerlerdiń biliktilikterin arttyrý maqsatynda olardy sheteldik arnaıy ekonomıkalyq aımaqtarǵa taǵylymdamaǵa jiberý de josparda bar.

Aıta keterligi, AEA qatysýshylary úshin barlyq qajetti jeńildikter qarastyrylǵan. ıAǵnı, rezıdentter korporatıvtik, jer jáne múlik salyǵyn tólemeıdi, sonymen qatar ornalasqan jer ýchaskelerine qajetti ınfraqurylym tartylady.