Arnaıy ekonomıkalyq aımaqtar úshin ındýstrııalandyrýdyń ekinshi besjyldyǵyna damý jospary jasalady - A. Raý

ASTANA. 16 shilde. QazAqparat - Aǵymdaǵy jyldyń sońyna deıin árbir arnaıy ekonomıkalyq aımaq úshin údemeli ındýstrııalandyrýdyń ekinshi besjyldyǵyna baılanysty ortamerzimdi damý jospary jasalady.

Búgin Úkimet otyrysynda Indýstrııa jáne jańa tehnologııalar vıtse-mınıstri Albert Raý osylaı málimdedi.

Vıtse-mınıstrdiń aıtýynsha, ındýstrııalandyrýdyń kelesi besjyldyq josparynda arnaıy ekonomıkalyq aımaqtar úshin barlyq qol jetkizýge bolatyn naqty negizgi kórsetkishter eskeriledi. «Atalǵan tapsyrmalardy oryndaý úshin biz halyqaralyq sarapshy retinde búgingi tańda uqsas jobalardy sátti júzege asyryp júrgen «Jurong» sıngapýrlyq kompanııasyn tartýdy josparlap otyrmyz. Al jospar arnaıy ekonomıkalyq aımaqtardy qosymsha qunmen birge joǵary tehnologııalyq, sapaly jobalarmen tolyqtyrý jáne barlyq arnaıy aımaqtarda ınfraqurylym qurylysyn aıaqtaý sekildi negizgi mindetterdi oryndaýǵa múmkindik beredi», - dedi A. Raý.