Arnaıy ekonomıkalyq aımaqtar bıýdjetke 170,2 mlrd teńge túsirdi

NUR-SULTAN. QazAqparat – Arnaıy ekonomıkalyq aımaqtar aýmaǵynda 711 salyq tóleýshi qamtylǵan. Bul týraly Qarjy birinshi vıtse-mınıstri Marat Sultanǵazıev málim etti, dep habarlaıdy QazAqparat tilshisi.

«Qazaqstan aýmaǵynda barlyǵy 13 Arnaıy ekonomıkalyq aımaq tirkelgen. Olardyń maqsaty - óńirler men ekonomıkanyń jekelegen salalaryn jedel damytý. AEA qatysýshylary arasynda 711 salyq tóleýshi qamtylǵan. Olar árbir AEA úshin belgilengen qyzmettiń basym túrlerin júzege asyrý kezinde zańnamada kózdelgen salyq pen kedendik preferentsııalar túrinde basym quqyq alady», - dedi M.Sultanǵazıev dóńgelek ústel otyrysynda.

Onyń aıtýynsha, 2019-2020 jyldary korporatıvtik tabys salyǵy jáne qosylǵan qun salyǵy boıynsha salyq jeńildikteri 128 mlrd teńgeni, kedendik bajdar men ımporttaǵy QQS boıynsha 2019-2021 jyldary 244 mlrd teńge somasynda jeńildikter jasaldy.

«2020-2021 jyldary salyq tólemderi turǵysynda bıýdjetke túsimder 170,2 mlrd teńgeni qurady. Salyq jáne keden zańnamasyna sáıkes, tıisti ákimshilendirý salyq tóleýshilerdiń barlyq sanattary boıynsha, onyń ishinde AEA qatysýshylaryna qatysty júrgiziledi», - dedi vıtse-mınıstr.