Arnaıy ekonomıkalyq aımaq qyzmetteri Úkimette talqylandy

NUR-SULTAN. QazAqparat - QR Premer-Mınıstriniń birinshi orynbasary Álıhan Smaıylovtyń tóraǵalyǵymen arnaıy ekonomıkalyq aımaqtar (AEA) qyzmetiniń tıimdiligin arttyrý boıynsha jumys tobynyń otyrysy ótti, dep habarlaıdy primeminister.kz.

Esterińizge sala keteıik, 2021 jylǵy 26 ​​qańtarda Úkimettiń keńeıtilgen otyrysynda Memleket basshysy bıýdjet qarajatyn tıimsiz AEA-ǵa jumsaýǵa bolmaıdy jáne olardy joıý kerek dep atap ótti.

Úkimette arnaıy jumys toby quryldy, onyń quramyna Esep komıtetiniń, Strategııalyq josparlaý jáne reformalar agenttiginiń, «Astana» halyqaralyq qarjy ortalyǵy men basqa da múddeli memlekettik organdar men uıymdardyń ókilderi kirdi.

Jumys tobynyń otyrysynda AEA tıimdiligin arttyrý tásilderine qatysty suraqtar kóterildi, onyń ishinde:AEA áreket etý merzimin belgileı otyryp, jeńildikter men preferentsııalar berý úshin naqty jáne aıqyn krıterıılerdi anyqtaý (joǵary tehnologııalar, ımportty almastyrý, joǵary qosylǵan qun, ınnovatsııa, eksportqa baǵdarlaý jáne t. b.);

• qoldanystaǵy zańnamany jetildirý arqyly óz mindettemelerin oryndamaǵany úshin ınvestorlardyń jaýapkershiligin belgileý;
• jeke AEA-nyń odan ári jumys jasaýynyń maqsattylyǵy, sonyń ishinde «Qorǵas» ShYHO, «Hımpark Taraz», «Astana - jańa qala»;

Qorytyndysy boıynsha jedel jáne júıelik sıpattaǵy sharalar usynyldy, olar AEA-da jobalardy iske asyrý boıynsha jumysty kúsheıtýge, basqarýshy kompanııalardyń qyzmetin jaqsartýǵa, sondaı-aq otandyq óndirýshilerdi damytý úshin teń básekelestikti qamtamasyz etýge baǵyttalǵan. Á. Smaıylov bir aptanyń ishinde AEA qyzmetin jaqsartý boıynsha usynylǵan tásilderdi pysyqtap, tıisti jobany talqyǵa salý úshin usynýdy tapsyrdy.

Búgingi kúni Qazaqstan Respýblıkasynda 13 AEA jumys isteıdi. Jumys istep turǵan AEA-da 303 joba iske asyryldy. 20 myńnan astam jumys orny quryldy.

AEA aýmaǵynda ónimniń 136 túri shyǵarylady, onyń ishinde 30-dan astam jańa ónim túrleri ındýstrııalandyrý baǵdarlamasyn iske asyrýdyń arqasynda paıda boldy (tikushaqtar, vıntovkaǵa arnalǵan optıkalyq kózdeýishter, túngi kórý qurylǵylary, bronetransporterler, lokomotıvter, elektr lokomotıvter, jolaýshylar vagondary, premıým-qubyrlar, maqta tsellıýlozasy, polıpropılen jipteri jáne basqalary), sonymen qatar 50-den astam biregeı AT sheshimderi men qyzmetteri kórsetiledi.